ՀՔԾ պետ Սասուն Խաչատրյանը տեղեկություն չունի պաշտպանության նախկին նախարար Միքայել Հարությունյանի ՌԴ քաղաքացի լինելու մասին։ Այս մասին նա հայտարարեց այսօր՝ օգոստոսի 2-ին կառավարությունում լրագրողների հետ զրույցում։
«Մեր տեղեկություններով՝ Միքայել Հարությունյանը միայն ՀՀ քաղաքացի է»,-նշեց նա։
Հարցին՝ պատրաստվո՞ւմ է ՀՔԾ-ն ստուգել այդ տեղեկությունը, Սասուն Խաչատրյանն ասաց․ «Կստուգենք»։
Ավելի վաղ ՀՔԾ-ն հայտարարել էր, որ 2008 թվականի մարտի 1-ից 2-ն ընկած ժամանակահատվածում Երեւան քաղաքում տեղի ունեցած իրադարձությունների վերաբերյալ քրեական գործի նախաքննության ընթացքում ձեռք բերված ապացույցների բավարար համակցության հիման վրա 2018 թվականի հուլիսի 3-ին որոշում է կայացվել Հայաստանի Հանրապետության պաշտպանության նախկին նախարար, գեներալ-գնդապետ Միքայել Հարությունյանին քրեական օրենսգրքի 300.1-ին հոդվածի 1-ին մասով որպես մեղադրյալ ներգրավելու մասին:
Հատուկ քննչական ծառայությունը տեղեկացնում է, որ Հարությունյանի նկատմամբ հայտարարվել է հետախուզում, նրա նկատմամբ որպես խափանման միջոց կալանավորումն ընտրելու վերաբերյալ 03.07.2018թ.-ին միջնորդություն է ներկայացվել դատարան: Նույն օրը դատարանի կողմից միջնորդությունը բավարարվել է: Մ. Հարությունյանի նկատմամբ որպես խափանման միջոց է ընտրվել կալանավորումը:
