Մոսկվայի Օստանկինսկի դատարանը երկրորդ փորձից բավարարել է քննության միջնորդությունը եւ կալանավորել իրենց հորը սպանած երեք քույրերին, հաղորդում է Lenta-ն: «Դատարանը, քննելով քննության միջնորդությունը, բավարարեց այն. քույրերը մինչեւ սեպտեմբերի 28-ը կալանավորվել են», - հաղորդել են դատարանից:
«Բոլոր երեքին արդեն մեղադրանք է առաջադրվել « նախնական պայմանավորվածությամբ մի խումբ անձանց կողմից իրականացված սպանություն» հոդվածով»,-հայտնել է Գլխավոր քննչական վարչության պաշտոնական ներկայացուցիչ Յուլիա Իվանովան:
Իվանովայի խոսքով, այս պահին արդեն հարցաքննվել են մեղադրյալների հարազատները, դասարանցիները եւ ծանոթները:
Փորձաքննությունն է նշանակվել, այդ թվում` բնակարանում սպանության գործիքները` դանակը եւ մուրճը հայտնաբերելու համար:
Ավելի վաղ՝ հուլիսի 31-ին, նույն դատարանը երկարացրել էր բոլոր երեքի ձերբակալության ժամկետը, քանի որ նիստին քննության պատրաստված ապացույցները բավարար չէին: Դատարանը համարել էր, որ կանոնավոր սեռական բռնության մասին աղջիկների վարկածը բավարար չափով չի ուսումնասիրվել եւ քննության առաջարկել էր դատաբժշկական փորձաքննություն անցկացնել, ինչի համար 72 ժամով երկարացրել էր ձերբակալության ժամկետը: Փորձագետները բռնության որեւէ նշան չեն հայտնաբերել, հայտնել է իրավապահ մարմինների աղբյուրը:
Զրուցակիցը նաեւ հայտնել է, որ քննության առաջին փուլում բոլոր 3 մեղադրյալները հակասական ցուցմունքներ են տվել, շփոթվում են մանրամասներում եւ տարբեր կերպ են պատմում կատարված սպանությունը: Դա արդեն կասկած է առաջացնում նրանց ազնվության վերաբերյալ: