Мama Рandа սթարթափը հարթակ է ստեղծել, որը երեխաներին թույլ է տալիս իրենց երազանքներն իրականացնել: Նույնանուն mamapanda.am նախագիծը ներկայացվել էր Sevan Startup Summit 2018-ում:
Սթարթափի հիմնադիր Հովհաննես Նազարյանը NEWS.am-ի թղթակցի հետ զրույցում նշեց, որ հարթակը հնարավորություն է ընձեռում նվիրատվությունների հաշվին երեխաների համար նվերներ գնել, որոնք կյանքի են կոչում նրանց երազանքները:
«Мama Рandа-ն մարդկանց, որոնց մանկական երազանքները տարբեր պատճառներով չեն իրականացել, թույլ է տալիս իրականություն դարձնել այլ երեխաների երազանքները»,- նշեց նա:
Նրա խոսքով՝ հարթակի ալգորիթմը երեխաներին թույլ է տալիս երազանք ընտրել, իսկ երեխաներին օգնել ցանկացող մարդկանց՝ տեսնել, թե նրանք ինչով են զբաղվում եւ ինչի մասին երազում, իսկ հետո փոխանցել իրենց նվիրատվությունները: Այնուհետեւ Мama Рandа-ի թիմը գնում է այդ խաղալիքները եւ երեխաներին նվիրում: Ընդ որում՝ երեխաների երազանքներն իրականացնելիս հաշվի չի առնվում նրանց սոցիալական վիճակը:
«Պետք չէ երեխաներին դասակարգել։ Նշանակություն չունի նվիրատվության գումարի չափը, երեխաները չեն երազում գերթանկարժեք նվերների մասին. նրանք գնդակ են ցանկանում, եթե երազում են ֆուտբոլիստ դառնալ, բժշկական խաղալիք պարագաներ, եթե ցանկանում են բժիշկ դառնալ: Օրինակ՝ Գավառի մանկատնից մի երեխա ցանկացել էր նվեր ստանալ թավշե կատվիկի»,- նշեց սթարթափի հիմնադիրը:
Նվիրատվություններ կատարելու համար անհրաժեշտ է հաշիվ ստեղծել mamapanda.am պորտալում եւ գրանցվել որպես դոնոր: Կայքում կարող են գրանցվել 4-16 տարեկան երեխաները: Երեխաներին ծառայություններ են մատուցվում բացառապես ծնողի կամ խնամակալի համաձայնությամբ:
«Մեր թիմը սկսել է խաղալիքներից, սակայն հեռանկարում մեր նպատակն է իրականացնել նաեւ սահմանափակ հնարավորություններով երեխաների երազանքները, նրանց համար ձեռք բերել բիոնիկ պրոթեզներ, որ իրականացվի քայլելու, բասկետբոլ խաղալու, պարաօլիմպիական խաղերին մասնակցելու նրանց երազանքը»,- նշեց Հովհաննես Նազարյանը:
