«Քաղաքացիական պայմանագիր» կուսակցությունում որեւէ անգամ չի քննարկվել Հրազդանի քաղաքապետի թեկնածության եւ հատկապես այդ պաշտոնում ՀՀ ԱԺ «Ելք» խմբակցության պատգամավոր Սասուն Միքայելյանի որդուն առաջադրելու հարցը։ Այս մասին այսօր՝ օգոստոսի 7-ին, «Ազատության» ֆեյսբուքյան ասուլիսին հայտարարեց փոխվարչապետ Տիգրան Ավինյանը՝ պատասխանելով հարցին, թե արդյոք ՔՊ–ն «պինդ» որոշե՞լ է, որ պատգամավոր Սասուն Միքայելյանի որդին պետք է լինի Հրազդանի քաղաքապետ։
«Ոչ, ՔՊ–ն «պինդ» որեւէ բան չի որոշել»,– նշեց Ավինյանը։
Հիշեցնենք, որ Հրազդանի քաղաքապետ Արամ Դանիելյանն հունիսի 25-ին հրաժարական է տվել: Ավելի ուշ թերթերից մեկը գրել էր, որ Հրազդանի քաղաքապետ է դառնալու «Քաղաքացիական պայմանագիր» կուսակցության վարչության նախագահ Սեւակ Միքայելյանը՝ Սասուն Միքայելյանի որդին։