Բիլզերյանների ընտանիքի՝ Արցախ կատարած այցի արդյունքում մենք կունենանք շատ ավելի գիտակից եւ տեղեկացված նոր «դեսպաններ», որոնք կարող են հարկ եղած դեպքում խոսել Արցախի հիմնախնդիրների մասին: Այս մասին NEWS.am-ի հետ զրույցում ասած Արցախի Մարդու իրավունքների պաշտպան Ռուբեն Մելիքյանը՝ անդրադառնալով ամերիկահայ միլիոնատեր, «պոկերի արքա» Դեն Բիլզերյանի՝ Արցախ կատարած այցի հետ կապված քննադատություններին:
Ըստ Մելիքյանի՝ մարդիկ չեն պատկերացնում՝ աշխարհն ինչպես է կառուցված, եւ ինչ տեղ ունի Արցախն այդ համայնապատկերում, ազդեցության ինչ հնարավորություններ կան միջազգային գործընթացների վրա:
«Կարեւորն այն է, որ մենք հասկանանք, որ գործ ունենք մի մարդու հետ, ով հետեւորդների մի մեծ շրջանակ ունի ոչ միայն շոու բիզնեսում, այլեւ քաղաքականությունում: Նա ունի քաղաքական շրջանակներում լայն կապեր, չհիշեցնեմ ԱՄՆ նախագահ Դոնալդ Թրամփի հետ կապերը, եւ այստեղ պետք է դիտարկել ԱՄՆ-ում հանրապետական ուղղվածության մարդկանց շրջանակը: Մեր Սփյուռքի կառույցներն ավելի շատ առնչվում են Դեմոկրատական կուսակցությանը հարող շրջանակների հետ, իսկ մենք պետք է որոշակի աշխատանք տանենք նաեւ Հանրապետական կուսակցությանը հարող ուժերի հետ: Դա պարզ դասագրքային ճշմարտություն է»,- նշեց Մելիքյանը:
Նա նաեւ հիշեցրեց, որ Բելզիրյանների ընտանիքն ունի հայկական ինքնություն, եւ դա վերաբերվում է ոչ միայն Դենին, այլեւ նրա ընտանիքի բոլոր անդամներին, ովքեր կարող են աջակցել Արցախի ճանաչման հարցում. «Մենք ճանաչելիության խնդիր ունենք: Իմ պատկերացմամբ՝ այդ ընտանիքը պետք է ավելի շատ կապված լինի հայկական հարցին, այս պարագայում Արցախի ճանաչելիության հարցին: Եվ մենք պատրաստ ենք այդ ուղղությամբ ձեռնարկել որոշակի քայլեր, խոսքը վերաբերում է Արցախի պետականությանը: Հիմա պատկերացրեք մի իրավիճակ, երբ սկսվի պատերազմ, այդ մարդիկ կարձագանքե՞ն իրենց կապերով եւ հնարավորություններով, եթե երբեւէ Արցախ եկած չլինեն ու սեփական աչքերով տեսած չլինեն»:
Անդրադառնալով հնչող քննադատություններին՝ նա նշեց, որ այս ամենը համարում է աշխարհի զարգացումներին ոչ այդքան լավ տիրապետելու խնդիր. «Կամ էլ մարդիկ ունեն բարոյական արժեքներ, որոնք ավելի կարեւոր են, քան հայրենիքը: Դա էլ է մոտեցում: Չեմ ցանկանում քննադատաբար խոսել: Ինձ անհանգստացնում է մոտեցումը, երբ սկսում ենք կարեւորել երկրորդական նշանակության խնդիրներն ավելի շատ, քան համազգային նշանակության հարցերը: Ի՞նչ պայմաններում եղավ այցելությունը, ո՞վ վճարեց, դրանք կարեւոր, բայց երրորդական հարցեր են: Սա սխալ մոտեցում է: Այստեղ ես կարեւորում եմ Արցախի գործոնը: Օրինակ՝ Քիմ Քարդաշյանն այցելեց Հայաստան, բայց չեկավ Արցախ, եւ ես դրա համար շատ ցավում եմ: Թող բերեն նման կարեւորության մարդկանց: Գիտեք, հիմա կյանքը փոխվել է, մարդկանց մտածողության վրա ազդեցություն չունեն կամ շատ ավելի քիչ ազդեցություն ունեն ակադեմիկոսները, տիեզերագնացները: Մենք ունենք այլ իրավիճակ, որից պետք է օգտվենք: Մարդիկ կարող են ունենալ բեմական կերպար ու վարքագիծ, որն ամբողջությամբ կարող է ինձ համար էլ ընդունելի չլինել, բայց ո՞ր մեկս է սուրբ»: