Այս տարի Հայաստան, Վրաստան և Ադրբեջան այցելող զբոսաշրջիկների թիվը կտրուկ աճել է: Այս մասին ասվում է Թամարա Քարելիձեի՝ Emerging Europe-ում հրապարակված հոդվածում:
Վրաստանում ամենամեծ աճն է գրանցվել. Վրաստանի զբոսաշրջության ազգային գործակալության տնօրեն Գիորգի Չոգովաձեն պնդում է, որ 2018 թվականի առաջին 6 ամիսներին Վրաստանում զբոսաշրջիկների թիվը, 2017-ի համեմատ, աճել է 20%-ով: Դրան նպաստել է Եվրոպայի տարբեր հատվածներից էժան թռիչքների հասանելիությունը:
Հայկական աղբյուրների համաձայն՝ 2017-ի համեմատ, զբոսարջիկների թիվն ավելացել է 10%-ով. Հայաստանի ազգային վիճակագրական ծառայության համաձայն՝ այս տարի հունվար-հուլիսին երկիրը հյուրընկալել է 700.000 այցելուի:
Մինչդեռ Ադրբեջանում արտասահմանյան այցելուների թիվը 1.65 մլն է՝ նույն ժամանահատվածի համար, ինչն ավելի քան 9%-ով ավելի է նախորդ տարվա համեմատ:
Հարավային Կովկասի 3 երկրներում էլ զբոսաշրջիկների մեծ մասը Ռուսաստանից և հարևան երկրներից է, չնայած ԵՄ-ից այցելուների թիվը նույնպես աճել է:
Հոդվածում նշվում է, որ Վրաստանը երեք երկրների մեջ ամենակոսմոպոլիտն է, քանի որ շարունակ ավելի գրավիչ է դառնում հոլանդացի, չեխ, գերմանացի, ֆրանսիացի և լեհ զբոսարջիկների համար, ինչպես նաև ամենատարածված այցելության վայրն է հարևան Հայաստանի և Ադրբեջանի զբոսաշրջիկների համար: