Արցախի Բերքաձոր գյուղի բնակչուհի Հայկուհի Յակուբովան իր 7 երեխաների հետ այսօր՝ օգոստոսի 30-ին, բողոքի ակցիա էր անցկացնում Կառավարության մոտ: Հայկուհին NEWS.am-ի հետ զրույցում ասաց, որ պահանջում է հանդիպում ՀՀ վարչապետ Նիկոլ Փաշինյանի հետ, որպեսզի վերջինս լուծի իր բնակարանային խնդիրը եւ երեխաների դպրոց հաճախելու հարցը:
«Արցախի Հանրապետության Ասկերանի շրջանի Բերքաձոր գյուղում կիսակառույց տուն ունեմ, բայց հիմա Գեղարքունիքի մարզի Կախական գյուղում հորական տանն եմ բնակվում 7 երեխաների հետ: Ամուսինն էլ արտագնա աշխատանքի է մեկնել: Շատ պարտքեր ունենք, 88 հազար դրամ թոշակով ենք ապրում: 7 երեխաներիցս 4-ը դպրոցական են, բայց չեմ կարողանում դպրոց ուղարկել, միջոց չունեմ: Եկել եմ բողոքեմ, որ գոնե կիսակառույց տունը վերջացնեն, երեխաներին դպրոց ուղարկեմ»,- ասաց կինը:
Նա նշեց, որ ամուսինն էլ հիվանդ է, ստամոքսի հիվանդություն ունի, լյարդը բորբոքված է: Այդ հիվանդությունները ձեռք բերել հացի փռում աշխատելու ժամանակ, հիմա էլ մեկնել է արտագնա աշխատանքի:
«Ես ուզում եմ վարչապետին դիմեմ, որ ասում եք գնացել Արցախ բոլորին բնակարանով ենք ապահովում, ինչի՞ իմ ընտանիքին բնակարանով չեք ապահովում»,- ասաց Հայկուհին՝ դիմելով վարչապետին:
Նա նաեւ պատմեց, որ հոր եւ 7 երեխաների հետ գիշերել է Կառավարության շենքի մոտ, սակայն պատրաստվում է գյուղ վերադառնալ, քանի որ երեխան հիվանդացել է եւ ջերմում է: