Մի քանի խոշոր բրիտանական ԶԼՄ-ների ղեկավարներ կոչ են արել անհապաղ վերահսկիչ մարմին ստեղծել, որը կօգնի պայքարել սոցիալական ցանցերում, ինչպիսիք են Facebook-ը եւ Twitter-ը, կեղծ տեղեկությունների տարածման եւ հալածումների դեմ: BBC հեռարձակող կորպորացիայի, Sky News- ի եւ ITV- ի, BT Group եւ TalkTalk հեռահաղորդակցության ընկերությունների ղեկավարների կողմից ստորագրված նամակից մի հատված կիրակի օրը հրապարակել էր Sunday Telegraph-ը, փոխանցում է «ՏԱՍՍ»-ը:
Նամակի հեղինակները կարծում են, որ անհրաժեշտ է գործել հենց հիմա, երբ բրիտանական իշխանություններն աշխատում են համացանցում անվտանգության բարելավման առաջարկությունների փաթեթի վրա: Նրանք պահպանողական կառավարությանը կոչ են անում հակազդել «ցանցային չարիքներին, որոնցից շատերը միայն ավելի են սրվում սոցիալական մեդիաների պատճառով». «Մենք իրատեսական կամ նպատակահարմար չենք համարում սպասել, որ համացանը եւ սոցիալական մեդիան առանց անկախ վերահսկման ինքնուրույն կկայացնեն բոլոր անհրաժեշտ որոշումներն այն մասին, թե որ բովանդակությունն է ընդունելի, իսկ որը՝ ոչ: Այս ոլորտում ընդունված որոշումների եւ թափանցիկության անկախ գնահատման հրատապ անհրաժեշտություն է ծագել: Խոսքը ոչ թե համացանցում գրաքննության մասին է, այլ այն մասին, որպեսզի հայտնի համացանցային հարթակներն ավելի անվտանգ դարձնել՝ հասնելով նրան, որպեսզի այդ մասնավոր ընկերությունների կողմից արվող քայլները հաշվետու եւ թափանցիկ լինեն»,- նշվում է նամակում:
