Նոր Հայաստանում հայկական եւ ամերիկյան բիզնեսի համատեղ բարգավաճման իրական հնարավորություններ կան: Ֆրանչայզինգի առեւտրային հնարավորությունների վերաբերյալ ֆորումի շրջանակներում հայ լրագրողների հետ զրույցի ընթացքում այս մասին հայտարարեց Հայաստանում ԱՄՆ դեսպան Ռիչարդ Միլսը:
«Մենք խրախուսում ենք Հայաստանի կառավարությանը շարունակել աշխատել բիզնես միջավայրի բարելավման եւ զարգացման ուղղությամբ: Բիզնես միջավայրը, ներդրումային միջավայրը կարող են շատ փխրուն լինել: Բավական է կառավարության մի սխալը՝ եւ այդ կվանի ներդրողներին: Ուստի ես հույս ունեմ, որ Հայաստանի կառավարությունը կշարունակի ուշադրությունը կենտրոնում պահել այն, թե ինչպիսի մթնոլորտ է ստեղծում բիզնեսի եւ ներդրումների համար», - ասաց դեսպանը:
Այսօր՝ սեպտեմբերի 5-ին, Հայաստանում ԱՄՆ դեսպանատունը եւ ԱՄՆ առեւտրային ծառայության մոսկովյան գրասենյակը հայակական IDBank-ի հետ միասին ֆրանչայզինգի առեւտրային հնարավորություններին նվիրված մեկօրյա համաժողով է անցկացնում:
Համաժողովը մի տանիքի տակ ավելի քան 50 հայ եւ ամերիկացի գործարարների է հավաքել՝ նպատակ ունենալով համագործակցության նոր հնարավորություններ ստեղծել: Ամերիկյան բիզնեսի ներկայացուցիչները հնարավորություն են ստացել ծանոթանալ Հայաստանում գործարար միջավայրի առանձնահատկություններին եւ ներկայացնել ֆրենչայզինգի իրենց տեսլականն այստեղ:
«Մենք հավատում ենք, որ այստեղ իրական հնարավորություններ կան, որպեսզի հայկական եւ ամերիկյան բիզնեսը միասին բարգավաճեն նոր Հայաստանում»,- ասաց Ռիչարդ Միլսը:
