Խորհրդարանը կարող է ինքնալուծարվել անգործունակության պատճառով։ Այս մասին այսօր՝ սեպտեմբերի 4-ին լրագրողների հետ զրույցում հայտարարեց ՀՀԿ–ական պատգամավոր Գեւորգ Կոստանյանը՝ մեկնաբանելով ՀՀ վարչապետ Նիկոլ Փաշինյանի հայտարարությունը ԱԺ–ի ինքնալուծարման համար սահմանադրական փոփոխություն նախաձեռնելու մասին։
Նրա խոսքով՝ պառլամետը խորհրդարանական երկրներում առաջնային մանդատ ունեցող մարմին է։ «Այսօր ՀՀ–ում առաջնային մանդատ ունի միայն պառլամենտը, քանի որ ընտրվում են ժողովրդի կողմից: Այսինքն՝ խորհրդարանն ունի պաշտպանվածության որոշակի երաշխիքներ՝ ըստ սահմանադրական իրավունքի: Պառլամենտները գնում են ցրման, որպես կանոն, անգործունակության պատճառով, երբ տարբեր պատճառներով պառլամենտն ունակ չէ կատարել իր ֆունկցիաները, այսինքն՝ ինքնալուծարումն ինքնանպատակ, որպես կոնցեպտի, ես ծանոթ չեմ։ Այսինքն ինքնալուծարման համար պայմաններ չկան, քանի որ Սահմանադրությամբ սահմանված չէ»,–նկատեց պատգամավորը։
Կոստանյանը չհամաձայնեց, որ երկրում ստեղծված իրավիճակը՝ այն, որ կառավարությունը խորհրդարանում մեծամասնություն չունի, ֆորսմաժորային է, բայց համաձայնեց՝ ոչ օրինաչափ իրավիճակ է: «Ֆորսմաժոր լինում է այն դեպքում, երբ ունենում ենք անգործունակություն, ասինքն պառլամենտը չի իրականացնում իր ֆունկցիաները, հետեւաբար, այո, ունենք ոչ օրինաչափ իրավիճակ, որը մեխանիկորեն, եթե պետք է հանգեցնի պառլամենտի ինքնալուծարման, իրավունքի տեսակետից ես արդարացված չեմ համարում, քաղաքական տեսակետից ամեն ինչ էլ կարող է լինել ես դա չեմ բացառում»,–եզրափակեց նա։
Հիշեցնենք, որ Երեւանի Հանրապետության հրապարակում իր պաշտոնավարման 100 օրվան նվիրված հանրահավաքում ՀՀ վարչապետ Նիկոլ Փաշինյանը հայտարարել է, որ նախաձեռնելու են սահմանադրական փոփոխություններ, որպեսզի վարչապետի հրաժարականից բացի՝ խորհրդարանը ցրելու այլ հնարավորություն էլ ստեղծվի: