Ախալքալաքում գրանցվել է H1N1 վարակի՝ «խոզի գրիպի» 24 դեպք, սակայն, իրականում, վարակվածների թիվը հասնում է 149-ի: Այս մասին հաղորդում է «Սամխրեթիս Կարիբջե»-ն:
Ինչպես նշում է Ախալքալաքի հասարակական առողջապահական կենտրոնի համաճարակաբան Ռոնիկ Ավագյանը, հիվանդների թիվն ավելին է, ուղղակի նրանց մասին տեղեկատվությունը բացակայում է: Հասարակական առողջապահական վերահսկման ազգային կենտրոնի վերջին տվյալներով,Վրաստանում արդեն գրանցվել է խոզի գրիպի 208 դեպք:
Կենտրոնի ղեկավար Նատա Ավալյանը հայտարարել է, որ հարբուխով վարակվածների թիվն, ի տարբերություն անցյալ տարվա, չի աճել: Ըստ համաճարակաբան Ռոնիկ Ավագյանի, Ախալքալաքում վարակվելու ռիսկն ավելի մեծ է:
«Այստեղ մարդիկ հիմնականում կապ ունեն Ռուսաստանի հետ, եւ այնտեղից վերադառնալով իրենք էլ չգիտեն վարակված են, թե՝ ոչ: Նրանք հիվանդությունների աղբյուր են հանդիսանում, ուստի յուրաքանչյուր ոք, հատկապես Ռուսաստանից ժամանածները, պետք է անպայման ստուգվեն»,-ասել է համաճարակաբանը: Նրա խոսքով, վարակի տարածման վտանգ կա նաեւ դպրոցներում:
«Մեր դպրոցներում մի դասարանում 40 աշակերտ է սովորում, իսկ օդափոխիչներ չկան: Պատկերացրեք, նույնիսկ եթե ընդամենը երկու աշակերտ վարակված լինի, միեւնույն է վարակը ազատ կտարածվի, հատկապես, եթե դասարանի պատուհանները հերմետիկ են, եւ աշակերտն այդ պայմաններում նստում է 5-6 դասաժամ»,-ավելացրել է նա:
Բարեբախտաբար, այսօր Ախալքալաքում ձյուն է եւ սառնամանիք, ինչը որոշ չափով խոչընդոտում է վարակի տարածմանը, սակայն օրերի տաքացման հետ, մտավախություն կա, որ վարակը արագորեն կտարածվի:
Առողջապահության նախարար Սանդրո Ուրուշաձեի խոսքով, H1N1 վարակի գագաթնակետը սպասվում է գարնանը:
Ախալքալաքի հասարակական առողջապահական կենտրոնի աշխատակիցները նշում են, որ Ախալքալաքիի բնակիչների զգուշավորությունը պակասում է: «Բնակիչները պետք է հարբուխի առաջին իսկ նշանների դեպքում դիմեն բժշկի, ինչպես նաեւ զգուշանան մարդաշատ վայրերից»,-խորհուրդ են տալիս նրանք:
Հաճախ, Ախալքալաքի բնակիչները, երբ հիվանդությունը թեթեւ է, բուժում են տնային պայմաններում: Սակայն նրանք պետք է անպայման դիմեն բժշկի, եթե նրանց շնչառությունը լավ չի, կամ 3 օրից ավել ջերմություն են ունենում: