Ավտոմեքենաների SpeedMe.ru պորտալը կազմել եւ հրապարակել է հեռավոր ճանապարհորդությունների համար հարմարավետ նոր ավտոմեքենաների վարկանիշային ցուցակը։ Ցուցակը գլխավորում է Toyota Land Cruiser 200-ը։
Փորձագետները բարձր են գնահատել այս մոդելի մեծ անցունակությունը, տարողունակ սրահը եւ հզոր շարժիչը, ինչպես նաեւ վարորդին օգնող մի շարք հարմարությունները, որոնք ապահով կդարձնեն երկարատեւ ճանապարհորդությունները։
2-րդ հորիզոնականում բրիտանական Land Rover Freelander 2-ն է։ Այս ավտոմեքենան ավելի շուտ քրոսովերների դասին է պատկանում, քան ամենագնացների, սակայն զարմանալի հավասարակշռության եւ դիզելային շարժիչի շնորհիվ այն առավել սառցադիմացկուն մեքենաներից է համարվում։
Թոփ եռյակը փակում է գերմանական Volkswagen Touareg-ը։ Վարկանիշային ցուցակի հեղինակները շեշտում են այս մոդելի պտտման պահի դինամիկ վերաբաշխումը, լուսադիոդային լուսարձակները, տեսախցիկը, սենսորներն ու խնայող շարժիչը։
4-րդ հորիզոնականում Audi Q7 քրոսովերն է, որի առավելությունների թվում նշվում են էլեկտրոնային օգնականներն ու այլ առաջատար տեխնոլոգիաները։ 5-րդ հորիզոնականում է հայտնվել BMW X5-ը, որը թույլ է տալիս ճանապարհորդել մոլորակի ցանկացած անկյուն երկարատեւ ժամանակով։ Բարձր է գնահատվել նաեւ տարողունակ սրահը։