Ես այսօր շատ պաշտոնապես հայտարարում եմ, որ Հայաստանի Հանրապետությունում օլիգարխիա եւ օլիգարխներ գոյություն չունեն։ Այս մասին այսօր՝ սեպտեմբերի 16-ին Երեւանի Գարեգին Նժդեհի հրապարակում «Իմ քայլը» դաշինքի նախընտրական քարոզարշավի ժամանակ ունեցած ելույթում հայտարարեց ՀՀ վարչապետ Նիկոլ Փաշինյանը։
«Մենք չենք ուզում, որ ժողովուրդը նայի կառավարության ձեռքին, մենք ուզում ենք, որ ժողովուրդը նայի կառավարության աչքերին, եւ ունենանք այնպիսի կառավարություն, որ ի վիճակի լինի ժողովրդի աչքերի մեջ ուղիղ նայել։ Մենք չենք ուզում, որ ժողովուրդը նայի, այսպես կոչված, օլիգարխիայի ձեռքերին, եւ ես այսօր շատ պաշտոնապես հայտարարում եմ, որ Հայաստանի Հանրապետությունում օլիգարխիա եւ օլիգարխներ գոյություն չունեն։ Որովհետեւ օլիգարխիա նշանակում է քչերի իշխանություն, Հայաստանում չկա եւ այլեւս չի լինելու քչերի իշխանություն, որովհետեւ իշխանությունը պատկանում է շատերին, այսինքն՝ ժողովրդին, եւ Հայաստանում օլիգարխ եւ օլիգարխիա այլեւս չի լինելու»,- ասաց Նիկոլ Փաշինյանը։
Նա շեշտեց, որ իրենք ասում են՝ Հայաստանում չպետք է լինեն արտոնյալ մարդիկ. «Մեզ պետք չեն, որ Հայաստանում 10 հատ իրար հետեւից նույն համարով ավտոներ պտտվեն շարասյուներով՝ ցույց տալու համար, որ իրենք առավել են ինչ-որ մեկից։ Եվ ես ուզում եմ ասել՝ Հայաստանում չկա ավելի բարձր կոչում, քան ՀՀ հպարտ քաղաքացի կոչումն է։ Ես էդ մարդկանց կոչ եմ անում՝ դադարեցրեք ձեր այդ նույն համարանիշերով մեքենաների, նույն գույներով, նույն բանդաժներով, նույն անտենաներով, նույն գույնի կոշիկներով եւ նույն գույնի նասկիներով շարասյուները, եղեք օրինապաշտ քաղաքացի եւ կվայելեք բոլորի հարգանքը։ Դադարեցրեք ձեր դրամապանակներով բոլորին զարմացնելու գործելակերպը, հակառակ դեպքում՝ ամեն օր կզարմանաք»։
Վարչապետի խոսքով՝ ինքը հանձնարարել է ոստիկանությանն ուսումնասիրել հարցը եւ օրենքով սահմանված լուծումներ տալ։
«Հայաստանում չպետք է լինեն ապօրինի ավտոշարասյուներ, որոնք քշում են մարդկանց վրա մայթերի վրայով, ուրիշ ավտոների վրայով, որոնք իրենց ամեն քայլով արհամարհանք են արտահայտում ժողովրդի նկատմամբ: Չի լինելու այդպիսի բան։ Գործարարներն ու գործարարությունը չափազանց կարեւոր ինստիտուտ են, ես ուզում եմ, որ վերջապես տեղի ունենա հաշտություն ՀՀ բոլոր քաղաքացիների միջեւ»,- ասաց Փաշինյանը։
