Ստեփանակերտում հունիսի 1-ին տեղի ունեցած ծեծկռտուքի գործով մեղադրյալ Դավիթ Հարությունյանի մասով քրեական գործը կարճվել է։ Այս մասին NEWS.am-ին ասաց նրա պաշտպան Ռաֆիկ Մարտիրոսյանը:
Հայտնի չէ՝ արդյոք մյուս մեղադրյալների մասով քրգործը նույնպես կարճվել է, թե ոչ։
Նշենք, որ ավելի վաղ դեպքի վերաբերյալ Ռաֆիկ Մարտիրոսյանը պատմել էր. «Դավիթ Հարությունյանին առաջադրված մեղադրանքն անհիմն է եւ անօրինական: Իմ պաշտպանյալը ցուցմունքներ է տվել տեսաերիզի կոնկրետ դրվագների վերաբերյալ: Ամեն ինչ սկսվել է մեքենան կայանելուց: Պետք է մեքենան կանգներ լվացարանի մոտ, սակայն, ԱԱԾ աշխատակիցներից մեկը Վիտալի անունով կանգնել է ճանապարհի կենտրոնական մասում, այնուհետեւ նորից շրջադարձ արել, հետ եկել: Դրանից հետո Վիտալին մտել է սենյակ եւ հետեւից հարվածել Դավիթ Հարությունյանին եւ մարմնական վնասվածք պատճառել: Սակայն, այսքանից հետո էլ Դավիթ Հարությունյանը եղել է բաժանողի դերում»։
Ավելի վաղ NEWS.am-ը հայտնել էր, որ Ստեփանակերտում հունիսի 1-ին քաղաքացիների ու ԱԱԾ հատուկջոկատայինների միջեւ ծեծկռտուք է տեղի ունեցել: Գործով այս պահին կա 7 մեղադրյալ, այդ թվում ԱԱԾ նախկին պետ Արշավիր Ղարամյանի որդին՝ Վարդան Ղարամյանը։