ՀՀ քննչական կոմիտեի նախագահի տեղակալ Արթուր Ղամբարյանն այսօր ընդունել է Երեւանում ԵԽ գրասենյակի պատվիրակությանը, որի կազմում ընդգրկված են եղել Երեւանում ԵԽ գրասենյակի փոխտնօրեն Լորետա Վիոյուն, ԵԽ մարդու իրավունքների հանձնակատարի գրասենյակի փոխտնօրեն Բոյանա Ուռումովան, ԵԽ Մարդու իրավունքների հանձնակատարի խորհրդական Անջեյ Մանցեւիչը:
Հանդիպման ընթացքում քննարկվել է ընտանեկան բռնությունների դեմ պայքարի, քննության առանձնահատկություններին վերաբերող հարցերի լայն շրջանակ։ ՀՀ ՔԿ նախագահի տեղակալ Արթուր Ղամբարյանը ներկայացրել է Քննչական կոմիտեի կողմից ձեռնարկված քայլերը՝ ընտանեկան բռնության դեպքերի առթիվ իրականացվող քննությունն առավել արդյունավետ դարձնելու, ինչպես նաեւ` դրանք կանխելու ուղղությամբ:
Ա.Ղամբարյանը նշել է նաեւ, որ Քննչական կոմիտեում վարվում է վիճակագրություն՝ ընտանեկան բռնությունների դեպքերի վերաբերյալ, որը հնարավորություն է տալիս առավել ամբողջական պատկերացում կազմել ընտանեկան բռնությունների տարածվածության աստիճանի, նպաստող պայմանների մասին:
Հանդիպման ընթացքում կարեւորվել է հատկապես անչափահասների դեմ ուղղված հանցագործությունների պատշաճ քննությունը եւ փաստվել, որ նման դեպքերի քննությունն իրականացվում է անչափահասների գործերով որակավորված քննիչների կողմից:
ԵԽ մարդու իրավունքների հանձնակատարի գրասենյակի փոխտնօրեն Բոյանա Ուռումովան շնորհակալություն է հայտնել՝ խնդիրը հետաքրքիր եւ համակողմանի ներկայացնելու համար եւ նշել, որ ընտանեկան բռնությունների հարցի նկատմամբ մոտեցումների եւ մտածելակերպի դրական փոփոխություն է նկատվում:
Կողմերը պայմանավորվել են շարունակել ակտիվ փոխգործակցությունը։