Սեպտեմբերի 21-ին Մոսկվայում Հայաստանի Հանրապետության Անկախության օրվա առթիվ հանդիսավոր ընդունելություն է տեղի է ունեցել:
Ընդունելության ժամանակ ՌԴ-ում Հայաստանի դեսպանը ելույթ ունենալով ներկաներին շնորհավորել է Հայաստանի պետական տոնի կապակցությամբ: Ելույթում դեսպան Վարդան Տողանյանը շեշտել է հայ-ռուսական ժամանակակից հարաբերությունների բարձր մակարդակը:
«27 տարվա ընթացքում մենք արաձանագրում ենք հայ-ռուսական հարաբերությունները կայուն աճի մասին: Բայց մեր հարաբերությունները դարեր են տեւել, եւ դրանք մեծ հաղթանակների եւ խորը ավանդույթների տարիներ են: Մեր երկրում տեղի ունեցած քաղաքական փոփոխություններից հետո, հեղափոխությունից հետո, նոր Հայաստանը Ռուսաստանի հետ հարաբերություններում ավելի խորը աճ է արձանագրում: Մենք պատրաստ ենք ընդլայնել համագործակցությունը կյանքի բոլոր ոլորտներում», - ասել է Տողանյանը:
Շնորհավորական ուղերձով հանդես է եկել Ռուսաստանի Դաշնության փոխարտգործնախարար, պետքարտուղար Գրիգորի Կարասինը: Իր ելույթում նա անդրադարձել է Հայաստանի եւ Ռուսաստանի Դաշնության միջեւ երկկողմ եւ բազմակողմ համագործակցության տարբեր կողմերին:
«Մեր երկրները կապված են պատմական կապերով: Այսօր մենք համոզվում ենք դրանում Հայաստանում տեղի ունեցող ներքաղաքական փոփոխությունների ֆոնի վրա: Չնայած այդ փոփոխություններին, հաստատվել է ռուս-հայկական համագործակցության շարունակման համար ուղղվածության հավատարմությունը», - ասել է Կարասինը:
Միջոցառմանը ներկա էին Եվրասիական տնտեսական հանձնաժողովի կոլեգիայի նախագահ Տիգրան Սարգսյանը, Ռուսաստանի Հայ Առաքելական եկեղեցու եւ Նոր-Նախիջեւանի թեմի արքեպիսկոպոս Եզրաս Ներսիսյանը, Պետական Դումայի պատգամավորներ, Ռուսաստանում հավատարմագրված ավելի քան 50 արտասահմանյան երկրների դեսպաններ, հայտնի ռուս մշակութային եւ գիտական գործիչներ, հայազգի ռուս ձեռնարկատերեր եւ Ռուսաստանի հայ համայնքի ներկայացուցիչներ:
Անկախության օրվա առթիվ ընդունելությունը շարունակվել է Արտեմ Լալայանի ղեկավարությամբ «Ջազ՝ հայկական առոգանությամբ» ծրագրով ջազ բենդի կատարմամբ:
