Տնտեսական ոլորտում հայ-կիպրական կապերի խորացման ու առևտրաշրջանառության ծավալների ավելացման անհրաժեշտությունը վարչապետ Փաշինյանը քննարկել է Կիպրոսի նախագահ Նիկոս Անաստասիադիսի հետ՝ ՄԱԿ-ի կենտրոնակայանում։ Այս մասին NEWS.am–ին հայտնում են ՀՀ վարչապետի լրատվական ծառայությունից։
Նրանք ընդգծել են Լեռնային Ղարաբաղի և կիպրոսյան հիմնախնդիրների՝ խաղաղ բանակցություններով լուծման անհրաժեշտությունը։ Զրուցակիցները կարևորել են նաև միջազգային տարբեր հարթակներում համագործակցությունը:
Նիկոլ Փաշինյանը անհրաժեշտ է համարել հայ-կիպրոսյան բարեկամական հարաբերությունների շարունակական զարգացումը և գոհունակություն հայտնել երկկողմ քաղաքական համագործակցության բարձր մակարդակից:
Նիկոս Անաստասիադիսը ջերմորեն է խոսել Հայաստանի և հայ ժողովրդի մասին ու ընդգծել, որ մեծապես կարևորում է երկկողմ գերազանց բարեկամական կապերի հետագա խորացումն ու ընդլայնումը:
Հայաստանի վարչապետը և Կիպրոսի նախագահն առևտրատնտեսական կապերի ընդլայնման գործում անհրաժեշտ են համարել բիզնես ֆորումի անցկացումն ու այդ ուղղությամբ քայլերի իրականացումը:
Նրանք կարեւորել են նաեւ Կիպրոսի հայ համայնքի դերը և համոզմունք հայտնել, որ այն կարող է կամուրջ դառնալ հատկապես տնտեսական փոխգործակցությունը զարգացնելու հարցում:
Նիկոս Անաստասիադիսը վարչապետ Փաշինյանին հրավիրել է Կիպրոս՝ իրեն հարմար ժամանակահատվածում:
