Իրան-Եվրոպա հարաբերություններում ամենակարեւոր խնդիրը միջուկային գործարքի ամրապնդման եւ պահպանման համատեղ ջանքերն են: Այս մասին հայտարարել է Իրանի նախագահ Հասան Ռոհանին Մեծ Բրիտանիայի վարչապետ Թերեզա Մեյի հետ հանդիպման ժամանակ, հաղորդում է ԻՌՆԱ-ն:
«Մենք պետք է փորձենք համապատասխան գործնական շրջանակների հասնենք այս համաձայնագրի պահպանման եւ լիարժեք իրականացման համար, հատկապես տնտեսական ոլորտում: Բազմակողմանի համաձայնագրերում կողմերի նկատմամբ պարտավորությունների կատարման հարցում պետք է հավասարակշռություն լինի», - ասել է Ռոհանին:
Նշելով, որ Իրանը շահագրգռված է Մեծ Բրիտանիայի հետ տարբեր ոլորտներում երկկողմ հարաբերությունների զարգացմամբ նա ասել է, որ երկու երկրների միջեւ բանկային համագործակցության ընդլայնումը կարող է նպաստել տնտեսական, առեւտրային եւ ներդրումային հարաբերությունների զարգացմանը:
Մեծ Բրիտանիայի վարչապետ Թերեզա Մեյն ընդգծել է միջուկային համաձայնագրի պահպանման անհրաժեշտության կապակցությամբ Թեհրանի եւ Լոնդոնի ջանքերի ու համագործակցության շարունակման կարեւորությունը:
Մեյը նաեւ նշել է, որ Մեծ Բրիտանիան ողջունում է Իրանի հետ հարաբերությունների զարգացումը եւ համագործակցությունը տարբեր ոլորտներում, այդ թվում տնտեսության եւ էներգետիկայի բնագավառում: