Երկուշաբթի Ինդոնեզիայում 5,1 մագնիտուդով նոր երկրաշարժ է տեղի ունեցել: Այս մասին հայտնում է ԱՄՆ Երկրաբանական ծառայությունը, հաղորդում է ՏԱՍՍ-ը:
Նրա տվյալներով, ցնցումների էպիկենտրոնը գտնվել է 282 հազար բնակչությամբ Պալու քաղաքից 101 կմ հյուսիս-արեւմուտք: Օջախը գտնվել է 10 կմ խորության վրա:
Տուժածների եւ ավերվածությունների մասին տեղեկություններ դեռ չեն հաղորդվել:
Սեպտեմբերի 28-ին Կենտրոնական Սուլավեսի նահանգում տեղի էր ունեցել 7,4 մագնիտուդով երկրաշարժ, երկու օրվա ընթացքում արձանագրվել է մոտ 170 կրկնվող ցնցում:
Ուժեղ ստորգետնյա ցնցումները դարձել են ցունամիի առաջացման պատճառ, որի ընթացքում ալիքների բարձրությունը 3-5 մ է կազմել: Վերջին տվյալների համաձայն, աղետի հետեւանքով զոհվել է ավելի քան 1,2 հազար մարդ, հարյուրավոր մարդիկ վիրավորվել են: Բացի դրանից, առնվազն 16 հազար բնակիչներ ստիպված են եղել լքել իրենց տները, հազարավոր տներ, հյուրանոցներ եւ առեւտրի կենտրոններ ավերվել են:
