Հայաստանը Եվրոպայի խորհրդի այն հինգ երկրներից է, որոնց դատական համակարգի բյուջեն բնակչության մեկ շնչի հաշվով ամենացածրն է։ Այս մասին է վկայում եվրոպական երկրներում դատական համակարգի մասին Եվրոպայի խորհրդի նոր զեկույցը։
Բնակչության մեկ շնչի հաշվով բյուջեն կազմում է 8,4 եվրո, ինչը 8 անգամ ցածր է Եվրոպայում միջին բյուջեից։
Հայաստանը նաեւ այն երկրներից է, որոնց 100 հազար բնակչին ընկնում է ամենաքիչ թվով պրոֆեսիոնալ դատավոր (7,7)։ Միեւնույն ժամանակ, զեկույցում ասվում է, որ Հայաստանի դատավորները, երկրում միջին աշխատավարձի հետ համեմատած, բարձր աշխատավարձ են ստանում։ Կարիերայի սկզբում դատավորները ստանում են երկրում միջին աշխատավարձից ավելի քան 4 անգամ բարձր, իսկ կարիերայի վերջում՝ նույնիսկ 8 անգամ բարձր աշխատավարձ։
Ըստ զեկույցի՝Հայաստանում 100 հազար բնակչին ընկնում է 61,9 իրավաբան, ինչը ավելի քան երկու անգամ ցածր է Եվրոպայի միջին ցուցանիշներից։
Ինչ վերաբերում է գենդերային հավասարությանը, ապա Հայաստանում դատախազների միայն 9 տոկոսը եւ իրավաբանների 41 տոկոսն են կանայք։