Հայաստանում մեկ տարում խոշոր եղջերավոր անասունների գլխաքանակը կրճատվել է 80 հազարով: Հոկտեմբերի 8-ին լրագրողների հետ հանդիպման ժամանակ այս մասին ասաց «Ագրարագյուղացիական միավորում» ՀԿ ղեկավար Հրաչյա Բերբերյանը: Նա հավելեց, որ սա, բնականաբար, հանգեցրել է կաթնամթերքի արտադրության խնդիրների:
Նրա խոսքով՝ Հայաստանում սպանդանոցների ներդրման անգրագետ քաղաքականությունը հանգեցրեց մսի գնաճի: Մինչդեռ գրագետ մոտեցման դեպքում կարելի էր 5-6 տարում խոշոր եղջերավոր անասունների գլխաքանակը 1,5 անգամ մեծացնել՝ հասցնելով մինչեւ 1 մլն 400 հազարի, ինչը տնտեսական եւ բնապահպանական տեսանկյունից առավել օպտիմալն է համարվում: «Սակայն այն մարդկանց չիմացության հետեւանքով, որոնք այս հարցով զբաղվում են, մենք հակառակ արդյունքն ունենք: Այս պահին 1 մլն 109 հազար արոտատեղիներից անհրաժեշտ ենթակառուցվածքի բացակայության պատճառով օգտագործվում է միայն 40-45 տոկոսը»,- նշեց փորձագետը:
Նա համաձայն չէ այն կարծիքին, որ Հայաստանը ագրարային երկիր է, քանի որ գյուղատնտեսության զարգացման մակարդակը միանգամայն այլ բանի մասին է խոսում: Ուստի եթե կառավարությունը ձգտում է ագրարային տնտեսական մոդելից անցում կատարել արդյունաբերականին, առավել եւս հետարդյունաբերականին, ապա նախ անհրաժեշտ է հասնել այն մակարդակին, երբ հնարավոր կլինի խոսել ագրարային զարգացած տնտեսության մասին, հավելեց Հրաչյա Բերբերյանը:
Անդրադառնալով մսի գնին, ՀԿ ղեկավարը «հուսադրեց», որ չնայած Բելառուսից տավարի մսի ներմուծմանը, այն կարող է 20-30 տոկոսով թանկանալ: Իսկ ոչխարի եւ խոզի մսի գները կպահպանվեն, թռչնամսի գինը կախված կլինի համաշխարհային շուկայում կերի գներից:
