Հայաստանի վարչապետ Նիկոլ Փաշինյանը շատ բաներով ինձ հիշեցնում է ամերիկյան հեղափոխության հիմնադիր եւ ԱՄՆ երկրորդ նախագահ Ջոն Ադամսին։ Այս մասին այսօր հայտարարեց ԱՄՆ դեսպան Ռիչարդ Միլսը՝ պատասխանելով լրագրողների այն հարցին, թե ինչու է Փաշինյանին նվիրել Ադամսի գիրքը։
Ջոն Ադամսը փոխեց ամերիկացիներին, ովքեր ուզում էին նոր կառավարություն, երկրում փոփոխություններ եւ ժողովրդավարություն՝ ասաց դեսպանը՝ հավելելով, որ Ադամսն ամբողջ կյանքում աշխատում էր, որ ժողովրդի ձայնը լսելի լինի եւ իրականանա։
«Նա այն տեսության կողմնակից էր, որ քաղաքական առաջընթացը կարող է տեղի ունենալ միայն շնորհիվ կիրթ եւ հարգալից երկխոսության, որին կմասնակցեն հասարակության բոլոր շերտերը»,- նշեց Միլսը։
Դեսպանը նշեց, որ գիրքը մակագրել է՝ օգտվելով Ջոն Ադամսի մի արտահայտությունից, որն ասում է, թե ամերիկյան հեղափոխությունը տեղի է ունեցել ոչ թե Ամերիկայի փողոցներում, այլ այն ամերիկացիների սրտերում եւ մտքերում, որոնք լսում էին միմյանց։ «Սա ուղերձ է այն մասին, որ լսել, մտածել, սրտերը եւ մտքերը փոխել պետք է քննարկումների միջոցով։ Սա ուղերձ է, որի հետ համաձայն է վարչապետը, եւ որը նա հասկանում է»,- ընդգծեց դեսպանը։