Washington Post-ը գրել է, որ ամերիկյան հետախուզությունը գիտեր սաուդյան լրագրող, իրենց աշխատակից Ջամալ Հաշքաջիին առեւանգելու սաուդացիների մտադրության մասին։

Սակայն հայտնի չէ, Միացյալ Նահանգներն արդյոք տեղեկացրե՞լ էին լրագրողին, որ նա թիրախ է, ինչպես նաեւ այն, որ մտադիր են նրան հարցաքննել կամ սպանել։

Ավելի վաղ The Washington Post-ի հրատարակիչ եւ գործադիր տնօրեն Ֆրեդ Ռայանը հայտարարել էր, որ Հաշքաջիին կարող էին «սառնասրտորեն սպանել՝ իշխանությունների թողտվության պայմաններում»։

ԱՄՆ փոխնախագահ Մայք Փենսը հայտարարել էր, որ Վաշինգտոնը պատրաստ է ցուցաբերել ցանկացած օգնություն լրագրողի անհետացման գործի հետաքննությանը։

Հոկտեմբերի 2-ին հայտնի էր դարձել, որ Հաշքաջին փաստաթղթերը ձեւակերպելու համար գնացել է Ստամբուլում Սաուդյան Արաբիայի հյուպատոսություն եւ անհետացել։ Հոկտեմբերի 6-ին ԶԼՄ-ները հայտնել էին, թե թուրքական ոստիկանությունը դիտարկում է հյուպատոսության շենքում նրա սպանության վարկածը։

Ջամալ Հաշքաջին հայտնի էր Էր Ռիադի ներկայիս քաղաքականության քննադատություններով։ 2017թ․ նա լքել էր հայրենիքը եւ հաստատվել ԱՄՆ-ում։