Սարյան 36 հասցեում բնակվող Բեգոյանների ընտանիքը կանգնած է անօթեւան մնալու վտանգի առաջ։ NEWS.am-ի հետ զրույցում Սարյան 36 հասցեի սեփականատեր Գագիկ Բեգոյանը պատմել է, թե ինչու են ոստիկանները բնակարանից վտարում երկու անչափահաս երեխաներ ունեցող ընտանիքին։
«Բնակարանի սեփականատերը ես եմ, տարիներ առաջ բնակարանը գրավադրել եմ բանկում 12 հազար դոլարի դիմաց եւ դժբախտ դեպքի պատճառով չեմ կարողացել վճարումներ կատարել։ Իմ բնակարանը հանել են աճուրդի, առանց ինձ տեղյակ պահելու, եւ վաճառել են 9 միլիոն դրամով, այնինչ իմ բնակարանը 150 հազար դոլար արժե։ Այդ գործարքը կատարել է Հայկ Հովսեփյանը, ով վստահ եմ կոռուպցիոն սխեմաներով է տիրացել բնակարանին»,-ասաց Գագիկ Բեգոյանը։
Նա նշեց,որ իրենք դիմել են Վճռաբեկ դատարան, գործը վարույթ է ընդունվել, սակայն բնակարանի նոր սեփականատեր Հայկ Հովսեփյանը դիմել է ոստիկանություն, որպեսզի իրենց բնակարանից վտարեն։
«Մենք դիմել ենք ոստիկանություն, որպեսզի կասեցնեն վտարելու գործընթացը, բայց չեն սպասել ոստիկանության պատասխանին, շաբաթ օրով եկել են, մեզ ցանկանում են վտարել, ասում են, սա մեր տունն է, պետք է դուրս գաք։ 2 տարի էլ գազն ու լույսն են անջատել բնակարանում, որ այստեղ չկարողոնանք բնակվել։ Բա կոռուպցիան էլ որտեղ է լինում, կոռուպցիան ստեղ է, էշի գլուխը ստեղ է թաղված»,-ասաց Գագիկ Բեգոյանը։
Նշենք, որ Բեգոյանների ընտանիքում 2 անչափահաս երեխա կա, ավագ որդին էլ ծառայում է Արցախում։
