Միացյալ Նահանգները հավատարիմ է ղարաբաղյան հակամարտության խաղաղ լուծման որոնումներում Հայաստանին եւ Ադրբեջանին աջակցությանը: Այս մասին հոկտեմբերի 16-ին Երեւանում անցկացված մամուլի ասուլիսի ժամանակ ասաց ԱՄՆ պետքարտուղարի Եվրոպայի եւ Եվրասիայի հարցերով օգնականի տեղակալ Ջորջ Քենթը:
«ԱՄՆ-ն աջակցում է կողմերի հանդիպումներին, եւ մենք աջակցում ենք առաջնորդների միջեւ ուղիղ զրույցներին»,- հայտարարեց Քենթը՝ խոսելով Դուշանբեում Հայաստանի վարչապետ Նիկոլ Փաշինյանի եւ Ադրբեջանի նախագահ Իլհամ Ալիեւի հանդիպմանան մասին:
Քենթը շեշտեց, որ ԱՄՆ-ն, Ֆրանսիան եւ Ռուսաստանը ԵԱՀԿ Մինսկի խմբի համանախագահներն են, եւ բոլորն աջակցում են ԵԱՀԿ սկզբունքները, որոնք հայտնի են նաեւ որպես Մադրիդյան սկզբունքներ, իսկ այս դեպքում առանցքային սկզբունքներ են համարվում ուժի չկիրառումը, տարածքային ամբողջականությունը եւ ինքնորոշման իրավունքը:
«Յուրաքանչյուր երկիր կարող է ունենալ իր մեկնաբանումը, սակայն սրանք հիմնական սկզբունքներն են: Մեր դերակատարումն այն է, որ դյուրացնենք ներգրավված կողմերի միջեւ շփումները, որպեսզի գտնվի հակամարտության լուծումը»,- նշեց Քենթը: