Մեծ թվով իրանական ընկերություններ են ցանկանում աշխատել «Մեղրի» ազատ տնտեսական գոտում, սակայն այն գործարկելու համար ոչ մի ակտիվ քայլ չի արվել: Այս մասին հոկտեմբերի 24-ին «Եվրասիական շաբաթ» միջազգային համաժողովի շրջանակում լրագրողների հետ զրույցում ասաց Հայաստանում Իրանի առեւտրի կցորդ Մոհսեն Ռահիմին:
Նա հավաստիացրեց, որ համապատասխան ենթակառուցվածքների առկայության դեպքում իրանական ընկերություններն անպայման կգան «Մեղրի» ԱՏԳ աշխատելու:
«Պատճառը, որ իրանական ձեռնարկատերերը «Մեղրի» ԱՏԳ-ում ռեզիդենտության հայտ չեն ներկայացնում այն է, որ ԱՏԳ-ն համապատասխան ենթակառուցվածքներ չունի եւ իր զարգացման նախնական փուլում է գտնվում: Անձամբ եղել եմ սահմանին ԱՏԳ տարածքում եւ պետք է ասեմ, որ այնտեղ ոչինչ արված չէ»,- ասաց Հայաստանում Իրանի առեւտրի կցորդը:
Նրա խոսքով՝ իրանցիների համար «Մեղրի» ԱՏԳ-ում աշխատելը շահավետ է եւ գրավիչ նրանով, որ դա շատ հարկատեսակներից է ազատում, դյուրացնում է մաքսային ընթացակարգերը, չի նախատեսում սակագնային որեւէ սահմանափակում: Ռահիմին նշեց, որ դրանից բացի, սահմանի մյուս կողմում է գտնվում իրանական «Արաս» ԱՏԳ-ն, եւ երկու գոտիների տարածքային ձեռնտու տեղակայումը նրանց հնարավորություն է տալիս արդյունավետ համագործակցություն հաստատել:
«Մնում է միայն սպասել, որ «Մեղրի»ԱՏԳ-ն սկսի աշխատել»,- շեշտեց կցորդը:
Նա այնուհետեւ շարունակեց, որ իրանական կողմից ԱՏԳ-ի հանդեպ հետաքրքրություն են դրսեւորում ամենատարբեր ոլորտների ընկերություններ՝ ավտոկառուցման, մսամթերքի արտադրության, մեքենաշինության, դեղագործության եւ այլն:
«Միաժամանակ, Հայաստանի մասնակցությունը իրանական կողմին հնարավորություն կտա դուրս գալ ԵՏՄ շուկա»,- նշեց Ռահիմին:
Հարցին՝ որքա՞ն ժամանակ պահանջվեց, որպեսզի «Արաս» ԱՏԳ-ն գործի, նա պատասխանեց, որ Իրանում նման գործունեությունը շատ հեշտ է ծավալվում, դրա համար համապատասխան պայմանները մեծ դյուրությամբ են ստեղծվում:
«Մեղրի» ԱՏԳ տնօրեն Աշոտ Զարբաբյանն իր հերթին նշեց, որ աշխարհում եւ ոչ մի ազատ տնտեսական գոտի չի կարող աշխատել հիմնադրումից հետո 1-2 տարում՝ բերելով «Արաս» ԱՏԳ-ի օրինակը, որն ամբողջ հզորությամբ գործարկվել է հիմադրումից միայն 5 տարի հետո:
«Առայժմ պատրաստ է միայն վարչական շենքը եւ ԱՏԳ ցուցադրության տարածքը, իսկ այն կսկսի գործել, երբ բոլոր բաղադրիչները իրար կկցվեն: Սա տեխնիկական հարց է»,- հավաստիացրեց «Մեղրի» ԱՏԳ տնօրենը:
Նրա խոսքով՝ ազատ տնտեսական գոտու հարցով իրանական ընկերությունների եւ ԵՏՄ-ից ընկերությունների հետաքրքրվածությունը բարձր է, սակայն իրենց կողմից կոնկրետ քայլեր դեռ չեն արվել. ազատ տնտեսական գոտում ռեզիդենտության համար ձեռնարկատերերը պետք է կոնկրետ ներդրումային նախագծեր եւ բիզնես ծրագրեր ներկայացնեն:
Զարբաբյանն ասաց, որ իրանական կողմից պասիվությունը կարող է պայմանավորված լինել Իրանից արտահանման արգելքի հետ, քանի որ մինչ ԱՏԳ-ի ստեղծումը բազմաթիվ իրանական ընկերությունների հետ քննարկումներ են անցկացվել, ինչպես նաեւ «Արաս» ԱՏԳ-ի հետ համագործակցության մասին հուշագիր է կնքվել:
Տնօրենը հիշեցրեց, որ միայն դեռ մեկ ընկերություն՝ «Բոնվարոն» ՍՊԸ-ն է «Մեղրի» ԱՏԳ-ում աշխատելու հայտ ներկայացրել, որը կառավարության կողմից դրական եզրակացություն է ստացել:
Այս ընկերությունը հաջորդ տարվանից կսկսի աշխատել ԱՏԳ-ի շրջանակներում: Այն նախատեսում է Իրանից հումք ներկրել Հայաստանում կաթնամթերք արտադրելու եւ այլ երկրներ արտահանելու համար:
Սյունիքի մարզում «Մեղրի» ԱՏԳ-ն բացվել է 2017-ի դեկտեմբերի 15-ին: