Հոկտեմբերի 29-ին ՀՀ պաշտպանության նախարարի պաշտոնակատար Դավիթ Տոնոյանն ընդունել է հերթական տարածաշրջանային այցով Հայաստանում գտնվող Մինսկի խմբի համանախագահներ Իգոր Պոպովին, Էնդրյու Շոֆերին եւ Ստեֆան Վիսկոնտիին: Հանդիպմանը մասնակցել է նաեւ ԵԱՀԿ գործող նախագահի անձնական ներկայացուցիչ Անջեյ Կասպրշիկը:
ՊՆ-ից NEWS.am-ին հայտնում են, որ զրուցակիցների խնդրանքով Դավիթ Տոնոյանն անդրադարձել է հայ-ադրբեջանական պետական սահմանին եւ արցախա-ադրբեջանական ուժերի շփման գծում տիրող իրավիճակին:
Պաշտպանական գերատեսչության ղեկավարը կարեւորել է սեպտեմբերին Դուշանբեում օպերատիվ կապի գործարկման վերաբերյալ Հայաստանի վարչապետի եւ Ադրբեջանի նախագահի միջեւ ձեռք բերված պայմանավորվածությունը` հույս հայտնելով, որ համանախագահող երկրները ջանքեր կգործադրեն կողմերի միջեւ նախիջեւանյան ուղղությամբ գործող կապի օրինակով օպերացիոն մյուս ուղղություններով եւս նմանատիպ կապի հաստատման ու գործարկման ուղղությամբ:
Շեշտելով, որ Հայաստանի զինված ուժերը աչալրջորեն հետեւում են իրավիճակին եւ վերահսկում բոլոր շարժերը, Դավիթ Տոնոյանը նշել է, որ ստեղծված պայմաններում անկյունաքարային նշանակություն ունի կողմերի միջեւ զինադադարի անվերապահ պահպանումը, միջադեպերի կանխարգելման եւ ռիսկերի նվազեցմանն ուղղված միջոցառումների իրականացումը: