Մարտի 1–ի գործով մեղադրյալ, ՀԱՊԿ նախկին գլխավոր քարտուղար Յուրի Խաչատուրովի մասնակցությամբ ավելի քան 3 ամիս է՝ որեւէ քննչական գործողություն չի կատարվել։ Այս մասին NEWS.am–ին ասաց Խաչատուրովի պաշտպան Միհրան Պողոսյանը։
«Կալանքի միջնորդությունից հետո, իսկ դա հուլիսի 28–ին էր, որեւէ քննչական գործողություն չի կատարվել։ Խափանման միջոցի վերաբերյալ առաջին ատյանի կայացրած որոշումն էլ բողոքարկել ենք Վճռաբեկ դատարան»,– ասաց պաշտպանը։
Նշենք, որ նոյեմբերի 2–ին ՀԱՊԿ գլխավոր քարտուղար Յուրի Խաչատուրովն ազատվել է զբաղեցրած պաշտոնից։ Հարցին՝ Խաչատուրովը կվերադառնա Հայաստան, Միհրան Պողոսյանը պատասխանեց. «Խաչատուրովն աշխատանքի բերումով գտնվում էր Մոսկվայում, այս պահին չենք քննարկել՝ կվերադառնա, թե ոչ, բայց որեւէ խնդիր չունենք Հայաստան չվերադառնալու հետ կապված»։
Հիշեցնենք, որ 2008 թվականի մարտի 1-ից 2-ն ընկած ժամանակահատվածում Երեւան քաղաքում տեղի ունեցած իրադարձությունների վերաբերյալ ՀՔԾ–ում քննվող քրեական գործով Յուրի Խաչատուրովին հուլիսի 26-ին մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով` սահմանադրական կարգը տապալելու համար։ Հուլիսի 28-ին Երեւանի ընդհանուր իրավասության դատարանի որոշմամբ Խաչատուրովը գրավի դիմաց ազատ էր արձակվել կալանքից։