ՀՀԿ–ն չի լինելու խորհրդարանում, որ մի հատ էլ ընդդիմություն լինի։ Այս մասին այսօր՝ նոյեմբերի 7-ին, ԱԺ–ում լրագրողների հետ զրույցում հայտարարեց ԱԺ «Ելք» խմբակցության պատգամավոր Էդմոն Մարուքյանը՝ պատասխանելով ՀՀ ԱԺ փոխխոսնակ Էդուարդ Շարմազանովի այն հայտարարությանը, որ ՀՀԿ–ն կարող է իրական ընդդիմություն լինել 7-րդ գումարման ԱԺ–ում։ «ՀՀԿ–ն կարող է լինել արտախորհրդարանական ընդդիմություն։ Ես դրանում առողջ բան եմ տեսնում»,–հայտարարեց Մարուքյանը։
Նա շեշտեց՝ ՀՀԿ–ում իրավիճակը ճիշտ չեն գնահատում. «Ես ամեն օր մարզերում եմ շփումների մեջ եմ, նրանք չեն կարողանում տեղի ունեցածը ադեկվատ գնահատել»։
Իսկ Շարմազանովի այն հայտարարությունը, թե 7 ամսվա ընթացքում «Լուսավոր Հայաստանը» ոչ մի անգամ չքննադատեց Նիկոլ Փաշինյանին, Մարուքյանն նշեց՝ Շարմազանովը ճիշտ չի ասում. «Նախ երբ պետք է եղել, քննդատել ենք՝ դա մեկ, երկրորդը՝ 7 ամսվա ընթացքում երկիրը եղել է կրիզիսի կառավարման մեջ, եւ մենք, այո՛, աջակցել ենք, որ հանկարծ հեղափոխությունը չտապալվի, հեղափոխության արժեքները չվերափոխվեն, եւ որեւէ սաբոտաժ տեղի չունենա»։
Իսկ Շարմազանովի այն հայտարարություններին, թե միայն իրենք են քննադատել, Մարուքյանն ասաց, որ միայն իրենք են ցանկացել սաբոտաժ անել, իսկ իրենք դա չենք թողել։
«Ես իմ հաշվարկներով գիտեմ, որ ՀՀ քաղաքացին, անգամ ամենասուրբ ռեյտինգային թեկնածուի խաթեր, չի գնա եւ չի վերցնի ՀՀԿ-ի քվեաթերթիկը, հետեւաբար Շարմազանովին ասեք, որ նախ մի հատ հայտնվեք խորհրդարանում, հետո կորոշեք՝ ընդդիմություն կլինեք, թե ոչ»,–եզրափակեց նա։
