Եթե Լենա Նազարյանը ամեն ինչով պարտական է Նիկոլ Փաշինյանին, Էդուարդ Շարմազանովը պարտական է միայն Աստծուն ու իր ծնողներին։ Այս մասին այսօր՝ նոյեմբերի 7-ին, լրագրողների հետ զրույցում ասաց 6-րդ գումարման ԱԺ փոխնախագահ Էդուարդ Շարմազանովը, մեկնաբանելով «Ելք» խմբակցության ղեկավար Լենա Նազարյանի հայտարարությունը, թե ժամանակին Էդուարդ Շարմազանովին Սամվել Ալեքսանյանն է անցկացրել խորհրդարան։
«Ես իմ քրիտինքով, իմ պայքարով դա ապացուցել եմ, պարոն Աշոտյանը նույնպես, Վիգեն Սարգսյանը նույնպես, մեր ՀՀԿ–ական գործընկերները նույնպես։ Որպեսզի քննադատեք պարոն Աշոտյանին ու պարոն Շարմազանովին եւ իր նմաններին, մեր արածի մի տոկոսը կանեք, երբ 10 տարի կլինեք իշխանության, ձեր աշխատանքի արդյունքը կտեսնենք, նոր կխոսենք։ Հերիք է Նիկոլ Փաշինյանի թիկունքում աչոկներ հավաքեք։ Նիկոլ Փաշինյանի շողքի տակ դարձել են հերոսներ, դուք ձեզանից զրո քաղաքական կապիտալ եք ներկայացնում։ Նիկոլը չլինի, մի շաբաթ գրիպ ընկնի, կկորեք սաղդ քաղաքական դաշտից»,–նշեց նա՝ վարչապետի պաշտոնակատար Նիկոլ Փաշինյանի առողջություն ցանկանալով. «Բայց Աստված պարոն Փաշինյանին առողջություն տա, ոչ թե ՔՊ–ի, այլ մեր պետությանը պետք է, մեր վարչապետն է»։