Եվրասիական տնտեսական միության շրջանակում առեւտրային խոչընդոտների եւ ճյուղային շուկաների ստեղծման աշխատանքներն անհրաժեշտ է արագացնել, հիմա այն տարվում է «պակաս համարժեք տեմպով», քան ցանկալի կլիներ, «ՌԻԱ Նովոստի»-ին ասել է Բելառուսի խորհրդարանի վերին պալատի միջազգային գործերի եւ ազգային անվտանգության հարցերի մշտական կոմիտեի ղեկավար Սերգեյ Ռահմանովը:
Մայիսի վերջին Վասիլի Մատյուշեւսկին, որն այդ ժամանակ զբաղեցնում էր Բելառուսի առաջին փոխվարչապետի պաշտոնը, նշել էր, որ ռուսական կողմը, փորձելով իր ներքին շուկան պաշտպանել, ԵՏՄ-ում լրացուցիչ խոչընդոտներ է ստեղծում: Ինչպես հայտարարել էր Մատյուշեւսկին, սրա հետ կապված կողմերը պետք է ջանքեր ներդնեն Միության ստեղծման մասին պայմանագիրն ամբողջ ծավալով կատարելու համար: Բելառուսի էկոնոմիկայի նախարարությունն, իր հերթին, նշել էր, որ ԵՏՄ շուկայում նոր առեւտրային խոչընդոտները եւ օրենսդրական բացառությունները ավելի արագ են հայտնվում, քան հները վերացվում են:
«Ակնհայտ է, որ այս աշխատանքը պետք է արագացվի, քանի որ չնայած մեր պայմանավորվածություններին, ԵՏՄ-ում բավականին մեծ թվով խոչընդոտներ են պահպանվում, եւ հաճախ որոշումներ են ընդունվում, որոնք ուղղակիորեն հակասում են Միության շրջանակում եղած համաձայնություններին»,- հայտարարել է Ռահմանովը:
Գործակալության զրուցակցի խոսքով՝ Միության անդամ երկրները պետք է՝ այնպես գործեն, որպեսզի ընդհանուր տնտեսական տարածքը «զարգացման մեջ դրական դինամիկա ունենա»: «Սկզբունքորեն հենց այդպես է, պարզապես աշխատանքը տարվում է պակաս համարժեք տեմպով, քան ցանկալի կլիներ»,- ասել է խորհրդարանականը:
