Չինական համացանցային առեւտրի հսկա Alibaba-ն կիրակի՝ տարվա մեջ առեւտրի իր գլխավոր օրը, որը ստացել է Ամուրիների օր անվանումը, առեւտրի ծավալով նոր ռեկորդ է սահմանել, փոխանցում է BBC-ն:
Վաճառքի առաջին 85 վայրկյանին ընկերությունը վաստակել է միլիարդ դոլար, իսկ մեկ օր տեւողությամբ կոնսյումերիզմի տոնի առաջին ժամի ավարտին ընկերության եկամուտները հասել են գրեթե 10 միլիարդի:
Ակցիայի ավարտից մի քանի ժամ առաջ Alibaba-ն գերազանցել է 2017 թվականի սեփական ռեկորդը, որը կազմում է 25,3 մլրդ դոլար:
Գնորդներն ընդհանուր առմամբ այդ օրը ծախսել են 30,8 մլրդ դոլար՝ 27 տոկոսով ավելի շատ, քան մեկ տարի առաջ: Դրա հետ մեկտեղ, Ամուրիների օրը առեւտրի ամբողջ պատմության մեջ ամենացածր տարեկան աճն է:
Ընկերությունը իր ստեղծած Ամուրիների օրվա առիթով առեւտրի տոնական օրեր է անցկացնում 2009 թվականից:
Alibaba Group-ի ղեկավար Դենիել Չենգի խոսքով՝ այդ օրը օգտատերերի իրականացրած ծախսի չափը ցույց է տալիս, որ գնորդները, ինչպես նախկինում, ձգտում են իրենց ամենօրյա կյանքի բարելավմանը:
Տոնը սկսվել է շաբաթ գալա համերգով, որին մասնակցել են ամերիկացի երգչուհի Մերայա Քերին, Բեյոնսեի ճապոնացի նմանակողը եւ Cirque du Soleil թատերախումբը կոշիկի թեմայով համարով:
