Ալավերդիում անցած տարվա նոյեմբերին 30–ամյա երիտասարդի սպանության, եւս 1 անձի էլ ծանր մարմնական վնասվածք պատճառելու մեջ մեղադրվող 29–ամյա Գարիկ Դալլաքյանը դատապարտվեց 15 տարվա ազատազրկման։
Ըստ մեղադրանքի՝ Հայկ Սիրադեղյանին սպանել են դաժանաբար՝ կտրելով պարանոցը, իսկ Արմեն Մակոյանը դանակի հարված է ստացել որովայնի շրջանում: Դատարանում պարզ է դարձել, որ Գարիկի ու մյուս երկու երիտասարդների միջեւ խնջույքի ժամանակ վիճաբանություն է սկսվել, երբ նրանց է միացել սպա Վարդան Ղ.–ն։ Վերջինիս կողմից զինվորական համազգեստ կրելն էլ դարձել է վիճաբանության պատճառ։ Վարդան Ղ.–ն ընկերոջ հետ հեռացել է, սակայն Գարիկ Դալլաքյանը նույն հարցի շուրջ վիճաբանել է Հայկ Սիրադեղյանի հետ, այնուհետև վիճաբանությունը շարունակել են ավտոտնակին կից տեղանքում։ Գարիկ Դալլաքյանն իր մոտ գտնվող գաղտնի փականով դանակով հարվածել է Հայկ Սիրադեղյանին եւ սպանել։ Այնուհետև մարմնական վնասվածք պատճառելու դիտավորությամբ կրկին դանակով Գարիկ Դալլաքյանը մեկ անգամ հարվածել է իրեն մոտեցող Արմեն Մակոյանի որովայնին` նրա առողջությանը պատճառելով ծանր վնաս և դիմել փախուստի:
Լոռու մարզի ընդհանուր իրավասության դատարանը 29–ամյա երիտասարդին մեղավոր է ճանաչել եւ դատապարտել 15 տարվա ազատազրկման։