ԱԺ Դաշնակցություն խմբակցության ղեկավար Արմեն Ռուստամյանը քաղաքական ուժերին զգուշացրեց 90-ական թվականների սխալները չկրկնել:
Նոյեմբերի 19-ին ճեպազրույցում ելույթ ունենալով՝ Ռուստամյանը կանխատեսեց, որ առաջիկա ընտրությունների արդյունքներով խորհրդարանը կհամալրվի նոր քաղաքական ուժերով եւ նոր դեմքերով: «Բայց հստակ չէ, թե նրանք ովքեր են եւ ինչ քայլերով են երկիրն առաջ տանելու: Ուստի անորոշությունները շատ են: Ըստ անորոշության՝ սա աննախադեպ ընտրություն է: Անցյալում էլ կտրուկ փոփոխություններ հնարավոր էին, իսկ հիմա կտրուկ փոփոխությունների հնարավորությունների հետ ահռելի աստիճանի անորոշության կա»,- նշեց Ռուստամյանը:
«Փոփոխությունները լավ բան են, սակայն պետք է կարողանալ անցյալը ճիշտ գնահատել: Ներկայիս գործընթացը շատ նման է 90-ականներին: 90-ին էլ շատ նոր բան ու նոր անձինք կային: Նոր իշխանությունները եկան եւ տեղերում նոր մարդկանց նշանակեցին: Իշխանության մեջ հայտնվեցին մարդիկ, որոնք նոր էին սովորում պետական կառավարումը: Այստեղից էլ առաջացան աղետները»,- շեշտեց Ռուստամյանը
ՀՅԴ ներկայացուցիչը դժվարացավ ասել, թե հարջորդ ընտրությունները երբ տեղի կունենան, բայց մեծ հույս ունի, որ այն տեղի կունենա, ինչպես կարգն է, 5 տարի հետո: «Որպեսզի երկիրը կայուն ապրի եւ զարգանա, այլ ոչ թե լարվածության վիճակում, այն էլ՝ միջազգային բարդ իրավիճակում ջնջելու եւ նորից սկսելու: Մենք պետք է բացասումից զարգացման անցնենք, եւ միաժամանակ, հասկանանք, թե ինչն ենք պահում»,- նշեց Ռուստամյանը՝ հավելելով, որ իշխանությունը մեծ թվով գայթակղություններ է պարունակում: Պատգամավորը, միաժամանակ, քննադատեց հոկտեմբերի 2-ին իշխանությունների գործողությունները, երբ խորհրդարանի վրա ճնշում գործադրելու փորձ արվեց: