Կոպենհագենում սպանել են 31-ամյա Նեդիմ Յասարին՝ խոշոր հանցավոր խմբավորման նախկին պարագլխին՝ տեղեկացնում է BBC News-ը։
Դա տեղի է ունեցել նրա ինքնակենսագրության հրատարակումից մեկ օր առաջ։ Այնտեղ նա պատմում էր, թե ինչպես է դադարեցրել հանցավոր գործունեությունը։
Սպանությունը կատարվել է նոյեմբերի 19-ի երեկոյան։ Ոստիկանության տվյալներով՝ մուգ հագուստով անհայտ տղամարդն առնվազն երկու անգամ կրակել է Յասարի վրա եւ հեռացել հանցանքի վայրից։ Յասարին տեղափոխել են հիվանդանոց, որտեղ նա ստացած վերքերից մահացել է։
Յասարը ծնվել է Թուրքիայում, 4 տարեկանից ապրել Դանիայում։ Երիտասարդ տարիներին նա գլխավորել է «Լոս Գերերոս»ավազակախումբը, որը Կոպենհագենում զբաղվում էր թմրամիջոցների վաճառքով։ Սակայն 2012թ․, իմանալով, որ շուտով հայր է դառնալու, նա որոշել է թողնել հանցավոր գործունեությունը եւ մասնակցել նախկին հանցագործների վերականգնման ծրագրին։
Շուտով Յասարը սկսել է իր հաղորդումը վարել տեղական Radio24 ռադիոկայանով, որտեղ պատմում էր իր կյանքի փորձի մասին։ 2017թ․ նրա վրա հարձակում էր տեղի ունեցել, սակայն այն հետեւանքներ չէր ունեցել։
Դանիայի վարչապետ Լարս Ռասմուսենը Յասարի մահը «բացարձակապես անիմաստ» է անվանել։