Անկարայի դատարանը ցմահ ազատազրկման է դատապարտել 74 զինծառայողների, ովքեր մեղադրվում են 2016 թ․ տեղի ունեցած պետական հեղաշրջման փորձին մասնակցելու մեջ։ Հայտնում են, որ մեղադրայալները փորձել են բռնությամբ փոխել սահմանադրական կարգը, կանխամտածված սպանություններ են գործել։

Ապստամբների խումբը 2016թ․ լույս հուլիսի 16-ի գիշերը փորձել էր զինվորական հեղաշրջում իրականացնել։ Հիմնական գործողությունները տեղի էին ունեցել Անկարայում եւ Ստամբուլում։ Զոհվել էր ավելի քան 240 քաղաքացի, 2000 մարդ վնասվածքներ էր ստացել։ Հեղաշրջման փորձը տապալվել էր։

Դրանից հետո Թուրքիայում ավելի քան 50 հազար մարդ էր ձերբակալվել, ավելի քան 160 հազար մարդ հեռացվել էր աշխատանքից։ Երկրի իշխանությունները հեղաշրջման կազմակերպման մեջ մեղադրում են իսլամական քարոզիչ Ֆեթուլլահ Գյուլենին, ով այժմ գտնվում է ԱՄՆ-ում եւ հերքում է այդ մեղադրանքները։