Մենք համարում ենք, և դա փաստ է, որ քաղաքական մեր թիմն այսօրվա դրությամբ կատարել է ժողովրդի առջև ստանձնած և ժողովրդի առջև ունեցած պարտավորությունները՝ առանց բացառության։ «Իմ քայլը» դաշինքի նախընտրական ծրագրի ներկայացման և դրամահավաք-երեկոյի ժամանակ ասաց ՀՀ վարչապետի պաշտոնակատար Նիկոլ Փաշինյանը:

«Վստահության քվե ենք ակնկալում ՀՀ կառավարման ղեկը առաջիկա հինգ տարիներին ստանձնելու համար»,- նշեց նա:

Նիկոլ Փաշինյանի խոսքով՝ իրենց համար կարևոր առաջիկա անելիքը քաղաքական հեղափոխության արդյունքների ամրապնդմանը զուգընթաց տնտեսական հեղափոխությունն է. «Սա ենթադրում է տնտեսության կառուցվածքի փոփոխություն: Այնպիսի փոփոխություն, որը կհամապատասխանի ազգային անվտանգության պահանջներին և մեր նպատակներին»:

Վարչապետի պաշտոնակատարի խոսքով՝ իրենց կառավարությունը նախատեսել է միկրոբիզնեսի հարկային պատավորություններից ազատում, ինչն աշխատանքի խրախուսման ամենակարևոր պայմաններից է:

«Մենք ուզում ենք, որ մարդիկ, ի վերջո, կարողանան ճեղքել հուսահատությունը և վստահել իրենց ուժերին: Սա պետք է լինի աղքատության հաղթահարման առաջնային գործիք»,- ասաց նա:

Ըստ Փաշինյանի՝ բարձր տեխնոլոգիական երկիր դառնալու կարևոր քայլերից մեկն է լինելու եկամտային հարկի իջեցումը:

«Վստահ ենք, որ այսպես կապահովենք այդ ոլորտում աշխատատեղերի ստեղծում և բարձր աշխատավարձերի սահմանում»,- ասաց նա՝ նշելով, որ իրենք նախորդ շաբաթ որոշել են «ստարթափերին» արտոնություններ տալ:

Նիկոլ Փաշինյանը նշեց, որ արտաքին քաղաքականության ոլորտում իրենց ասելիքը մնում է նույնը. «Մենք չենք պատրաստվում այս ոլորտում ռեվերսներ իրականացնել, մեր առաջնահերթությունները մնում են նույնը։ Ռուսաստանի հետ ռազմավարական դաշինքի ուժեղացումը, առանձնահատուկ հարաբերությունների հաստատումը հարևաններ Իրանի և Վրաստանի հետ մնում է նույնը։ Շարունակելու են հարաբերությունների զարգացումը ԱՄՆ-ի, ԵՄ-ի հետ, բայց դա չեն անելու այլ երկրի հետ ունեցած մեր հարաբերությունների հաշվին»,–ասաց նա։

Վարչապետի պաշտոնակատարը դրական համարեց նաև ՀՀ-ի անդամակցությունը ԵԱՏՄ-ին և նշեց, որ կա պոտենցիալ և միջավայր այդ կառույցում ակտիվություն դրսևորելու պարագայում ՀՀ-ի տնտեսության զարգացման համար:

Նիկոլ Փաշինյանի նշեց, որ իրենց առաջ դրել են ամբիցիոզ խնդիրներ. «Խնդիր ենք դրել, որ Հայաստանում պետք է արմատախիլ արվի ծայրահեղ աղքատությունը․ դա հարիր չէ նոր Հայաստանին, 21-րդ դարի Հայաստանին, պետք է էականորեն կրճատվի աղքատությունը եւ առաջին հերթին աշխատանքի եւ անհատական ջանքի շնորհիվ»։