Եվրամիությունը ԱՄՆ իշխանություններին կոչ է անում միանալ Առեւտրի համաշխարհային կազմակերպության (ԱՀԿ) բարեփոխմանը։ Այդ մասին երեքշաբթի Բրյուսելում հայտարարել է առեւտրի հարցերով եվրահանձնակատար Սեսիլիա Մալմսթրեմը՝ տեղեկացնում է ՏԱՍՍ-ը։
«Շատ երկրներ են աջակցում դրան (ԱՀԿ-ի բարեփոխմանը)։ Այդ պատճառով, խնդրում ենք, նստեք սեղանի շուրջ եւ խոսեք մեզ հետ։ Նրանք դա մինչ այժմ չեն արել։ Կլինի՞ դա։ Ով գիտի»,- առեւտրի հետ կապված համաժողովի շրջանակներում լրագրողներին ասել է նա։
Երկուշաբթի ԵՄ-ն բարձրաձայնել էր ԱՀԿ-ի վճռաբեկ մարմնի բարեփոխման մասին առաջարկը, որը դեկտեմբերի 12-ին կներկայացվի կազմակերպության Գլխավոր խորհրդին։ Այս նախագիծն արդեն իսկ համաձայնեցված է Ավստրալիայի, Իսլանդիայի, Հարավային Կորեայի, Հնդկաստանի, Կանադայի, Մեքսիկայի, Նոր Զելանդիայի, Նորվեգիայի, Շվեյցարիայի, Չինաստանի հետ։