Ադամանդագործությունը պետք է լինի նոր Հայաստանում տնտեսության առաջ մղող շարժիչ ուժերից մեկը: Այս մասին, այսօր՝ նոյեմբերի 30-ին, Նոր Հաճնի հրապարակում բնակիչների հետ հանդիպման ժամանակ նշեց վարչապետի պաշտոնակատար, «Իմ քայլը» դաշինքի ցուցակը գլխավորող Նիկոլ Փաշինյանը:
«Նոր միջավայրում դա այնքան էլ հեշտ լուծելի խնդիր չէ, բայց կարծում եմ, որ Հայաստանի վստահելիությունը մեծանալուն զուգընթաց մենք կկարողանանք այդ ոլորտում հաջողության հասնել»,-ասաց Փաշինյանը:
Նա նշեց, որ 2000-2010 թվականներին Նոր Հաճնում մոտ 10 հազար աշխատատեղ է փակվել ադամանդագործության ոլորտում, ինչը տեղի է ունեցել այն մանիպուլյացիաների պատճառով, որոնք տեղի են ունեցել դրամի փոխարժեքի հետ:
Վարչապետի պաշտոնակատարը ընդգծեց, որ իրենք աշխատում են այդ ուղղությամբ, որ ադամանդագործության ոլորտում լուրջ ներդրումներ գան Հայաստան, հատկապես Նոր Հաճնում, որտեղ կա մասնագիտական աշխատանքային ռեսուրս:
