ԵՄ-ն հույս ունի, որ ԱՄՆ-ն ու ՌԴ-ն կօգտագործեն մնացած 60 օրը միջին եւ փոքր հեռահարության հրթիռների ոչնչացման մասին պայմանագիրը պահպանելու համար, որն անհրաժեշտ է եվրոպական մայրցամաքում անվտանգության համար, հայտարարել է ԵՄ դիվանագիտության ղեկավար Ֆեդերիկա Մոգերինին, փոխանցում է «ՌԻԱ Նովոստի»-ն:
«Եվրոպան սառը պատերազմի տարիներին երկար ժամանակ դիմակայության դաշտ է եղել, այս պատճառով մենք գնահատում ենք անվտանգության ճարտարապետությունը, որը երկար տարիներ երաշխավորել է եվրոպական մայրցամաքում խաղաղությունն ու անվտանգությունը, իսկ ՄՓՀՀՊ-ն Եվրոպայում խաղաղությունն ու անվտանգությունը երաշխավորել է 30 տարի շարունակ: Այն պետք է ամբողջությամբ կատարվի»,- հայտարարել է Մոգերինին՝ ժամանելով ՆԱՏՕ մասնակցելու բանակցություններին:
«Կարծում եմ, որ 2 կողմերը ողջամտորեն կօգտագործեն պայմանագրի պահպանման եւ այն լիովին կատարելու նրա խնդիրներին հասնելու աշխատանքի համար հատկացված ժամանակը: Եվ մենք մեր կողմից նույնպես մեր ավանդը կբերենք, որ այն հնարավոր դառնա»,- հավելել է նա:
Ավելի վաղ ԱՄՆ պետքարտուղար Մայք Պոմպեոն հայտարարել է, որ Ռուսաստանը 2 ամիս ժամանակ ունի ՄՓՀՀՊ-ի կատարմանը վերադառնալու համար: Նա հավելել էր, որ եթե դա տեղի չունենա, ապա Վաշինգթոնը կդադարեցնի ՄՓՀՀՊ իր պարտավորությունները: Ի պատասխան Պոմպեոյի խոսքին՝ ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ Մոսկվան պայմանագիրն անշեղորեն կատարում է, եւ Վաշինգթոնին այս մասին հայտնի է:
