ՀՀ տարածքային կառավարման ու զարգացման նախարարի պաշտոնակատար Սուրեն Պապիկյանը ներկայացրեց աղետի գոտում 2018 թվականի ընթացքում կատարված եւ 2019 թվականի ընթացքում կատարվելիք աշխատանքների վերաբերյալ զեկույցը։

Նա նշեց, որ 2018-ին առաջնահերթ լուծում պահանջող խնդիրների լուծման համար Շիրակի եւ Լոռու մարզերին հատկացվել է 774 միլիոն 425 հազար դրամ։

«Շիրակին հատկացվել է 354 միլիոն 915 հազար, իսկ Լոռիին՝ 419 միլիոն 510 հազար դրամ», - նշեց Սուրեն Պապիկյանը՝ հավելելով, որ գումարը հատկացվել է շուրջ 45 բնակավայրում 54 ծրագիր իրականացնելու համար:

Նույն ծրագրի շրջանակներում ՀՀ Շիրակի եւ Լոռու մարզերի համայնքներին հատկացվել է 42,973 հազար  դրամ, որից ՀՀ Շիրակի մարզին՝ 31,773.0 հազար դրամ, իսկ Լոռու մարզին՝ 11,200.0 հազար դրամ:

Ս. Պապիկյանի խոսքով՝ 2018 թվականի ընթացքում հանձնաժողովի կողմից ՀՀ Շիրակի եւ Լոռու մարզերում հավանության են արժանացել 33 սուբվենցիոն ծրագրեր՝ 1,599,282.1 հազար դրամ ընդհանուր բյուջեով:

«27 ծրագրերի մրցույթի արդյունքում ծրագրերի գումարը կազմել է 903,809.4 հազ. դրամ, որից պետական բյուջեի ֆինանսավորման չափը՝ 381,274.3 հազ. Դրամ:

ՀՀ Շիրակի եւ Լոռու մարզերում 4 ճանապարհների վերանորոգման նպատակով ՀՀ տրանսպորտի, կապի եւ տեղեկատվական տեխնոլոգիաների նախարարությանը հատկացվել է 222,654.7 հազար  դրամ: Աշխատանքները կշարունակվեն նաեւ 2019 թվականին», - ասաց Ս. Պապիկյանը։

Հայաստանի տարածքային զարգացման հիմնադրամի միջոցով ՀՀ Լոռու եւ Շիրակի մարզերում իրականացվում են 7 ծրագրեր, որոնցից 2-ի ավարտը նախատեսված է 2019 թվականին: Ծրագրերի ընդհանուր արժեքը կազմում է 1,939,574,1 հազար դրամ, որից Շիրակի մարզում՝ ,207,377.4 հազար դրամմ Լոռու մարզում՝ 732,196.7 հազար դրամ:

Պապիկյանի խոսքով՝ Վերակառուցման եւ զարգացման եվրոպական բանկի աջակցությամբ իրականացվող «Գյումրու քաղաքային ճանապարհներ» տեխնիկական համագործակցության դրամաշնորհային ծրագրի շրջանակներում հատկացվել է շուրջ 1,082,100.0 հազար դրամ:

«USAID-ի կողմից ՀՀ Շիրակի մարզի Ամասիա, Արփի, Սարապատ եւ Աշոցք համայնքների համար ճանապարհաշինական տեխնիկա, ինքնագնաց գյուղտեխնիկա եւ կցովի գյուղ. գործիքներ ձեռք բերելու նպատակով հակտացվել է 1,486,9 մլն դոլար», - նշեց նա։

Սուրեն Պապիկանը տեղեկացրեց նաեւ, որ ԵՄ-ի հետ համագործակցության արդյունքում ՀՀ Շիրակի եւ Լոռու մարզերում իրականացվում են տարածաշրջանային զարգացման պիլոտային ծրագրեր։ Նշենք, որ խոսքը 4 պիլոտային ծրագրերի մասին է: