Շաբաթվա սկզբից Լիբիայում շարունակվող հակակառավարական բողոքի ակցիաների ընթացքում զոհվածների թիվն արդեն 41 է: Նրանց ուղիղ կեսը զոհվել է խռովությունների էպիկենտրոնում` երկրի արեւելյան մասում գտնվող մեծությամբ երկրորդ քաղաք Բենգազիում: Ըստ ԻՏԱՌ-ՏԱՍՍ-ի`հաղորդվում է նաեւ Դերնայում յոթ զոհվածների մասին:
Էլ- Բայդա քաղաքն անցել է ապստամբ բնակիչների ձեռքը: Ներկայումս այն շրջափակված է անվտանգության ուժերի կողմից : Փետրվարի 18-ին այդ բնակավայրում հակակառավարական բողոքի մասնակիցները կախաղան են հանել երկու ոստիկանի, որոնք փորձել են ցրել ցուցարարներին:
Իրավիճակը երկրում, հատկապես արեւելյան մասում, սրվում է ժամ առ ժամ: Հարաբերական հանգիստ մթնոլորտ է մայրաքաղաք Տրիպոլիում, որտեղ վերջին օրերին տեղի են ունեցել կառավարող ռեժիմի եւ երկրի առաջնորդ Մուամարա Քադաֆիի աջակցության միտինգներ:
