Մանհեթենի շրջանի դաշնային դատախազները կարծում են, որր ԱՄՆ նախագահ Դոնալդ Թրամփի նախկին իրավաբան Մայքլ Քոհենը Թրամփի անմիջական կարգադրությամբ պոռնոդերասանուհուն եւ նախկին  ֆոտոմոդելին վճարել է ներկայիս Սպիտակ տան ղեկավարի հետ հավանական ինտիմ կապերի մասին լռելու համար: Այս մասին ասվում է այսօր դատախազությունից Նյու Յորքի դատարանին փոխանցված փաստաթղթերում, որոնք հրապարկվել են նրա էլեկտրոնային բազայում, հաղորդում է ՏԱՍՍ-ը:

Դրանցում նշվում է, որ իրավաբանը վճարումները կատարել է մի մարդու համակարգմամբ եւ կարգադրությամբ, որն այդ ժամանակ մասնակցում էր ԱՄՆ-ի նախագահական մրցարշավին, իսկ հետագայում զբաղեցրել է Սպիտակ տան ղեկավարի պաշտոնը: Թրամփի անունը փաստաթղթերում չի նշվում, սակայն ինչպես հաստատում է The New York Times թերթը եւ Associated Press (АР) գործակալությունը, խոսքը ԱՄՆ ներկայիս նախագահի մասին է: Թրամփը նախկինում հերքել էր վճարումների մասին՝ պնդելով, որ Քոհենը առանց իր գիտության  է գործել:

АР-ն նշում է, որ սա առաջին դեպքն է, երբ քննիչները նշել են ենթադրյալ դաշնային հանցագործության հետ Թրամփի կապի մասին: Սակայն փաստաթղթերում անմիջականորեն նախագահի հասցեին ոչ մի մեղադրաք չկա:

Այս տարվա օգոստոսին Քոհենը Նյու Յորքի դատարանում իրեն մեղավոր էր ճանաչել դաշնային մեղադրանքի 8 կետերով, այդ թվում հարկերից խուսափելու, նախընտրական քարոզարշավի ֆինանսավորման կանոնների խախտման, բանկային ոլորտում խարդախությունների եւ ԱՄՆ-ի ֆինանսական կազմակերպություններին կեղծ տեղեկությունների տրամադրման առնչությամբ:

Ֆինանսավորման կանոնների խախտումը վերաբերում է միջոցների ոչ նպատակային օգտագործմանը, որը հատկացվել էր նախընտրական արշավի համար: Դրանց մի մասը վճարվել է երկու կանանց լռության համար, որոնք պնդում են, որ նախկինում Թրամփն իրենց հետ արտաամուսնական կապեր է ունեցել: Խոսքը պոռնոդերասանուհի Ստեֆանի Քլիֆորդի եւ նախկին ֆոտոմոդել Կարեն Մաքդուգալի մասին է: