Իրկուտսկի մարզային դատարանը ցմահ ազատազրկման է դատապարտել Անգարսկից նախկին միլիցիոներ Միխայիլ Պոպկովին, որը մեղավոր է ճանաչվել 60 սպանության մեջ, փոխանցում է ՏԱՍՍ-ը:
«Ըստ հանցագործությունների ընդհանրացման՝ պատիժների համակցության միջոցով Պոպկով Միխայիլ Վիկտորովիչին վերջնական պատիժ նշանակել ցմահ ազատազրկումը հատուկ ռեժիմի գաղութում»,- դատավճիռը հրապարակելիս ասել է դատավոր Ալեքսեյ Ժիգաեւը: Դատարանի որոշմամբ Պոպկովը նաեւ զրկվել է միլիցիայի կրտսեր լեյտենանտի կոչումից:
Իրկուտսկի մարզի դատախազության ավագ պետական մեղադրող Ալեքսանդր Շկինեւը լրագրողներին պարզաբանել է, որ հոգեբանա-հոգեբուժական փորձաքննության արդյունքների համաձայն՝ հանցագործությունների կատարման դրդապատճառը մարդասպանության կիրքն է՝ հոմիցիդոմանիան: Ընդ որում՝ նա մեղսունակ է ճանաչվել:
Շկինեւը նաեւ նշել է, որ Պոպկովը մտադիր է դատավճիռը բողոքարկել Գերագույն դատարան, քանի որ միլիցիայի կոչումից զրկելը նրան թոշակից է զրկում: Նախկինում կայացված դատավճիռը 22 սպանության մեղադրանքով նրան կոչումից չէր զրկել, նա ամսական շուրջ 24 հազար ռուբլի թոշակ էր ստանում:
Անգարսկից նախկին միլիցիոները ձերբակալվել էր 2012 թվականին: 2015 թվականի հունվարին Իրկուտսկի մարզային դատարանը նրան 22 սպանության համար դատապարտել էր ցմահ ազատազրկման: 2017 թվականի մարտին Պոպկովին մեղադրանք էր ներկայացվել եւս 60 հանցագործության համար, որոնցից յուրաքանչյուրով նա խոստովանական ցուցմունքներ է տվել: ՔԿ-ն գործը դատարան էր ուղարկել դեկտեմբերին:
