Հիմնվելով դիտորդների նախնական զեկույցների վրա՝ Ամերիկայի հայկական ազգային կոմիտեն (ԱՀԱԿ) հրապարակել է իր հայտարարությունը՝ կապված Հայաստանում կայացած ընտրությունների հետ․․․
«Ամերիկայի հայկական ազգային կոմիտեն (ԱՀԱԿ) շնորհավորում է Հայաստանի ժողովրդին՝ ազատ եւ արդար խորհրդարանական ընտրությունների կապակցությամբ՝ ողջունելով այս նշանակալի ձեռքբերումը որպես ժողովրդավարության հաղթանակ եւ նոր դարաշրջանի սկիզբ՝ ԱՄՆ-ի եւ Հայաստանի միջեւ ռազմավարական գործընկերության մեջ»,- ասվում է հայտարարության մեջ։
ԱՀԱԿ-ում հայտարարել են, որ իրենք արդեն իսկ աշխատում են ամերիկյան եւ հայկական կարեւոր շահագրգիռ կողմերի հետ, որպեսզի, հիմնվելով Հայաստանում խաղաղ, սահմանադրական եւ ժողովրդավարական անցումային գործընթացի վրա, առաջ մղեն կոնկրետ փոխշահավետ նախաձեռնություններ, որոնք երկրների միջեւ կխորացնեն եւ կընդլայնեն երկկողմ քաղաքական, տնտեսական եւ ռազմական հարաբերությունները։
«Երկկողմ կապերի զարգացման հարցում մեր աջակցությանը զուգահեռ՝ մենք պետք է աճող սթափությամբ հաստատակամորեն մարտահրավերներ նետենք Միացյալ Նահանգներում, տարածաշրջանում եւ ողջ աշխարհում Թուրքիայի եւ Ադրբեջանի շահերին, քանի որ նրանք ձգտում են օգտվել անցումային շրջանից, որպեսզի խանգարեն, մեկուսացնեն կամ հարձակումներ գործեն Հայաստանի եւ Արցախի վրա»,- ասվում է հայտարարության մեջ։