7-րդ գումարման ազգային ժողովում կլինի 132 պատգամավոր՝ նախորդ 105-ի փոխարեն: 27 լրացուցիչ մանդատ ստացած պատգամավորի և նրանց օգնականների համար պետբյուջեից տարեկան կհատկացվի մոտ 279 մլն դրամ․ այս հաշվարկն արել է Tert.am-ը։
Ըստ Ընտրական օրենսգրքի՝ Ազգային ժողովը բաղկացած է նվազագույնը 101 պատգամավորից: 6-րդ գումարման Ազգային ժողովն ուներ 105 պատգամավոր․ նվազագույն 101-ին գումարվել էր 4 մանդատ՝ ազգային փոքրամասնությունների մանդատները:
ԱԺ արտահերթ ընտրություններում «Իմ քայլը» դաշինքը ստացել է ձայների 70.44%-ը, հետեւաբար ոչ իշխանական ուժերին տրվելու են լրացուցիչ մանդատներ, որպեսզի Սահմանադրության պահանջի համաձայն՝ ապահովվի 30% ընդդիմություն։ Ըստ այդմ՝ «Իմ քայլը» կունենա 88 մանդատ, ԲՀԿ-ը՝ 26, ԼՀԿ-ը՝ 18:
«Պետական պաշտոններ զբաղեցնող անձանց վարձատրության մասին» ՀՀ օրենքի համաձայն՝ ԱԺ պատգամավորի չհարկված աշխատավարձը կազմում է 661 400 դրամ, իսկ պատգամավորի օգնականի չհարկվող աշխատավարձը՝ 198 420 դրամ:
Լրացուցիչ 27 պատգամավորի համար պետական բյուջեից ամսական հավելյալ կհատկացվի 17 մլն 857 հազար 800 դրամ, տարեկան՝ 214 մլն 293 հազար 600 դրամ: Իսկ 7-րդ գումարման ԱԺ-ի ամբողջ գործունեության՝ 5 տարվա ընթացքում 27 պատգամավորի աշխատավարձը կկազմի 1 մլրդ 71 մլն 468 հազար դրամ:
Նրանց օգնականների համար ամսական կտրամադրվի 5 մլն 357 հազար 340 դրամ, տարեկան՝ 64 մլն 288 հազար 80 դրամ:
Այսպիսով, հավելյալ 27 պատգամավորի և նրանց օգնականների համար պետությունը տարեկան կվճարի ևս 278 մլն 581 հազար 680 դրամ: