Որ պետք է հասնել նրան, որ ավելի քիչ ռեսուրսներով ավելի շատ արդյունք ստանալ, այստեղ երկրորդ կարծիք չկա, բայց մեր գործընկեր Համաշխարհային բանկի հետ ունենք երկխոսության պակաս: Այս մասին, այսօր՝ դեկտեմբերի 13-ին, կառավարության նիստում հայտարարեց տնտեսական զարգացման եւ ներդրումների նախարարի պաշտոնակատար Տիգրան Խաչատրյանը:
Նշենք, որ խոսքը վերաբերում է «Արտասահմանյան ֆինանսական ծրագրերի կառավարման կենտրոն» պետական հիմնարկի գործունեությունը դադարեցնելուն, ինչի հետ կապված ՀԲ Երեւանի գրասենյակը մտահոգություններ է ներկայացրել կառավարությանը:
«Իրենք փաստարկներ են ներկայացրել, մենք հակափաստարկներ ենք ներկայացրել եւ համաձայնություն չկա: Իրենց նպատակը մեկն է՝ համոզված լինել, որ մեր որոշումներով ապահովելու ենք այդ ապահովության երաշխիքները»:
Սրան Նիկոլ Փաշինյանն արձագանքեց. «Այսինքն ՀԲ-ն ավելի շատ է շահագրգռված մեր արդյունավետությամբ, քան մեր կառավարությունը: Եթե այստեղից դուրս կա որեւէ մարմին կամ անհատ, որն ավելի շատ է մտահոգված Հայաստանի կառավարության գործունեության արդյունավետությամբ, ուրեմն կներեք, էստեղ պետք է լուրջ հետեւություններ անել»:
Տիգրան Խաչատրյանի պարզաբանմանը, որ գուցե մենք ավելի լավ ենք անելու, բայց մինչեւ վերջ լավ չենք բացատրել, Փաշինյանն ասաց. «Եթե կառավարությունում կան մարդիկ, որոնք ի հեճուկս վարչապետի հանձնարարության ոչ թե բացատրում են դա, այլ հակառակն են բացատրում, ուրեմն բացատրության վրա ավելի երկար ժամանակ կծախսվի: Ուրեմն գնացեք, բացատրեք, քաղաքական որոշումը կայացված է: Ոնց ուզում եք բացատրեք»:
Տրգրան Խաչատրյանն առաջարկեց սկզբում ՀԲ-ին պարզաբանումներ ներկայացնել, ընդհանուր հայտարարի գալ, նոր կառավարության որոշում կայացնել: Վարչապետի պաշտոնակատարն ասաց. «Ասեմ՝ ինչու ենք շտապում, որովհետեւ դեռեւս սեպտեմբերին տրված են եղել հանձնարարականներ եւ ոչ մի նշան չկա, որ այդ հանձնարարականները սկսել են կատարվել: Իսկ ինչո՞ւ չենք շտապում վարչապետի հանձնարարականները կատարել: Ով ուզում է ՀԲ-ի հանձնարարականներն ավելի շուտ կատարել, թող գնա աշխատի Համաշխարհային բանկում: Կառավարությունում աշխատողը պետք է կատարի վարչապետի հանձնարարականները»:
Խնդրին անդրադարձավ նաեւ ֆինանսների նախարարի պաշտոնակատար Ատոմ Ջանջուղազյանը՝ նշելով. «Եթե սրանք մեր ծրագրերն են, կարծում եք, որ ԾԻԳ-ի տնօրենին կարելի է վստահել այդ ծրագրերի իրականացումը, իսկ օրինակ, նախարարին չի՞ կարելի վստահել»:
