Շերիֆ Շեկատը, ով ահաբեկչություն է իրականացրել Ստրասբուրգում, զինված է եղել 1892թ․ արտադրված ատրճանակով՝ տեղեկացնում է ՏԱՍՍ-ը՝ վկայակոչելով France Info ռադիոալիքին եւ LCI հեռուստաալիքին։

Հեռուստաալիքի տվյալներով հենց այդ ատրճանակից է նա կրակել երեք ոստիկանների վրա եւ ոչնչացվել նրանց պատասխան կրակոցից։ Խոսքը ֆրանսիական բանակի 8 մմ տրամաչափով ատրճանակի մասին է։

France Info-ն հայտնում է, թե «այն, որ ատրճանակը շատ հին եւ ցածր նշանառությամբ է եղել, բացատրում է, թե ինչու ահաբեկչի գնդակը մոտ տարածությունից չի կպել երեք ոստիկաններին»։

Ոստիկանների համար հետաքննության սկզբից էլ պարզ էր, որ ահաբեկիչը հին զենք է օգտագործում։ Ատրճանակի այս տեսակը վաղուց դուրս է եկել գործածությունից։ Այն արտադրվել է Սենտ Էտյեն քաղաքի համանուն գործարանում՝ ընդամենը 350 000 հատ։

Զինված ուժերն ատրճանակը չեն օգտագործում 1950 թվականից, եւ չնայած այն լայնորեն օգտագործվել է ֆրանսիական բանակի կողմից, 1914թ․, երբ սկսվել է Առաջին համաշխարհային պատերազմը, արդեն հնացած է համարվել։

20-րդ դարի սկզբին եւ կեսերին ատրճանակը Ֆրանսիայում նույնիսկ ազատ վաճառքում է եղել։ Դրա փամփուշտներն արտադրվել են մինչեւ 1964թ․։

Ոստիակնությունը հայտնել է, որ սպանված ահաբեկչի մոտ 8 փամփուշտ էր մնացել։