Երկրում, որտեղ պաշտպանված չեն մարդկանց իրավունքները եւ չկա իշխանության բաժանում, չկա Սահմանադրություն: Այս մասին այսօր՝ դեկտեմբերի 15-ին, մամուլի ասուլիսում նշեց Կառուցողական կուսակցության նախագահ Անդրիաս Ղուկասյանը:
Նրա խոսքով, ՀՀԿ-ն ձգտում էր ստեղծել այնպիսի իրավիճակ, որ գործադիր, օրենսդիր եւ դատական իշխանությունների բոլոր հարցերը ՀՀԿ-ի ներսում որոշվեր. «Այդ կուսակցությունը ուներ որոշակի քվե խորհրդարանում եւ նախագահի պաշտոնն էր հսկում եւ ունենում էր այդ կարողությունը: Այսօր ունենք նույն իրավիճակը. «Իմ քայլը» դաշինքը, ըստ էության, իր կուսակցության ներսում կարող է որոշումներ կայացնել, որոնք պարտադիր կլինեն եւ գործադիր, եւ օրենսդիր իշխանությունների, նույնիսկ կարող է կուսակցության ներսում որոշումներով ձեւավորել դատական իշխանություն»,-ասաց Անդրիաս Ղուկասյանը՝ հավելելով, որ սա ահազանգ է, որ քաղաքական ուժերը միավորվեն Սահմանադրության փոփոխության շուրջ, որը կստեղծի այնպիսի մեխանիզմ, որը կբացառի որեւէ ուժի կողմից նման իշխանական մոնոպոլիա ունենալու հնարավորությունը:
Անդրիաս Ղուկասյանը նկատեց, որ հասարակությունը հիմա դա դրական է համարում, որովհետեւ այդկերպ հնարավոր եղավ հեռացնել ռեժիմին. «Բայց երկիրը ղեկավարելու տեսակետից, ցանկացած մենաշնորհ չարաշահումների մեծ դաշտ է ստեղծում: Դա հասկանում են եւ աջերը, եւ ձախերը, որոնք չեն հայտնվել խորհրդարանում»:
