2018 թվականի հունվարից աշխարհում առնվազն 80 լրագրող է սպանվել իրենց մասնագիտական գործունեության ընթացքում։ Այս մասին ասված է մամուլի ազատության տարեկան զեկույցում, որը «Լրագրողներ առանց սահմանների» իրավապաշտպան կազմակերպությունը հրապարակել է երեքշաբթի՝ դեկտեմբերի 18-ին, փոխանցում է DW-ն:
Սպանված լրագրողների թվի կեսից ավելին բաժին է հասնում հինգ երկրների՝ Աֆղանստանին (15 մարդ), Սիրիային (11), Մեքսիկային (9), Եմենին (8) եւ Հնդկաստանին (6): Հունիսին ԱՄՆ–ում Capital Gazette պարբերականի խմբագրության վրա հարձակումը նույնպես 6 լրագրողների մահվան պատճառ է դարձել։
Մեքսիկան, որտեղ զիված հակամարտություն չի ընթանում, միակ երկիրն է սպանված լրագրողների մեծ թվով։ Ռազմական հակամարտությունների գոտում 11 ամիսների ընթացքում զոհվել է 44 լրագրող։
Քաղաքացիական լրագրության ներկայացուցիչների սպանությունների թիվը 2017 թվականի համեմատությամբ գրեթե 2 անգամ ավելացել է՝ 7-ից 13 մարդու հասնելով, նշվում է զեկույցում։
Բացի այդ, աշխարհում այժմ 348 լրագրող է գտնվում կալանքի տակ, որի կեսից ավելին բաժին է ընկնում 5 երկրների՝ Չինաստան, Եգիպտոս, Թուրքիա, Իրան եւ Սաուդյան Արաբիա: